پارێزگارێ دهۆكـێ سەرەدانا دەڤەرداریێن شێخان و بەردەڕەش و ئاكـرێ كـر
رەمەزان زەكەریا:
د چارچۆڤێ سەرەدانێن مەیدانی و دووڤچوونا رەوشا گشتی و خزمەتگوزاری ل سنۆرێ پارێزگەهێ، د. عەلی تەتەر، پارێزگارێ دهۆكێ سەرەدانا هەر سێ دەڤەرداریێن شێخان و بەردەڕەش و ئاكرێ كر، د ڤان سەرەدانان دا پارێزگار ژ نێزیك هایداری رەوشا ژیانا وەلاتییان و قووناغێن بجهئینانا پڕۆژەیێن جودا بوو.
پارێزگارێ دهۆكێ سەرەدانا دەڤەرداریا شێخان كر و ژ لایێ سەردار شێخ یەحیا، دەڤەردارێ شێخان ڤە پێشوازی لێ هاتە كرن و د دیدارەكێ دا بەحسێ قووناغێن پڕۆژەیێن خزمەتگوزاری و رەوشا ئێمناهییا دەڤەرێ كر، د. عەلی تەتەر دووپات كر كو ئیدارا پارێزگەهێ یا رژدە ل سەر دابینكرنا پێدڤیێن دەڤەرداریێ و بجهئینانا وان پێشنیارێن د خزمەتا بەرژەوەندییا گشتی دا.
دیسا پارێزگارێ دهۆكێ سەرەدانا دەڤەرداریا بەردەڕەشێ كر و ژ لایێ بڕوا فارووق، دەڤەردارێ بەردەڕەشێ ڤە پێشوازی لێ هاتە كرن، د كۆمبوونەكێ دا بەحس ل وان پڕۆژەیێن د وارێ بجهئینانێ دا هاتە كرن، ب تایبەتی پڕۆژەیێن چێكرن و سەخبێكرنا رێك و پرێن دەڤەرێ یێن ژ ئەگەرێ بارانێن ئەڤ سالە زیان گەهشتینێ، پارێزگاری گۆت: «بزاڤێن رژد دێ هێنە كرن بۆ دابینكرنا هەموو پێدڤیێن وەلاتییان ل دەڤەرێ».
پاشی د. عەلی تەتەر، پارێزگارێ دهۆكێ سەرەدانا دەڤەرداریا ئاكرێ كر و ژ لایێ دلاوەر بوزۆ، دەڤەردارێ ئاكرێ ڤە پێشوازی لێ هاتە كرن، د روونشتنەكێ دا رەوشا گشتی یا دەڤەرداریێ و پێدڤیێن وەلاتییان د وارێ خزمەتگوزارییان دا دانوستاندن ل سەر هاتە كرن، پارێزگاری گوهداریا پێشنیارێن دەڤەرداری كر، بۆ بلندكرنا ئاستێ خزمەتێن گشتی، دا كو ب باشترین شێوە خزمەتا ئاكنجیێن دەڤەرێ بهێتە كرن.
