نەورۆز د جەرگێ تاریاتییێ دا
ئاشتی یونس
ل سەردەمێ ڕژێما بەعس یا ستەمکار، گەنجەکێ کوردپەروەر ژبەر چالاکیێن سیاسی یێن نهێنی هاتە دەستەسەرکرن و بەر ب جەرگێ تاریاتییا زیندانەکا پڕ ژ بێ هیڤیبوونێ هاتە ڕەڤاندن، د وێ تاریاتییێ دا، وی د ناخێ خۆ دا چرایەکێ گەش یێ هیڤی و ئازادییێ هەلکربوو، کو چ جاران نەدهاتە ڤەمراندن.
ئەو گەنجە خودان بەهرە بوو؛ دەستێن وی یێن رەنگین و زێرین، ل سەر دیوارێن سار و کەڤن وێنە دئافراندن و ژیان ددایێ، و خودان دەنگەکێ پڕ سۆز و نازك بوو. دناڤ زیندانێ دا، ب دیدارا هەڤالێن دۆزا گەل و هەڤرێبازێن خەباتێ شاد ببوو. هەر چەندە ژیانا وان دناڤ ئەشکەنجەیان دا دبۆری، لێ وان نەهێلا خەمۆکی گیانێ وان داگیر بکەت و ئیرادە و کەرامەتا وان بژکینیت و وێ چرایا هیڤییێ یا دناخێ وان دا بمرینیت.
دەمێ جەژنا نەورۆزێ نێزیك بووی، وی گەنجی ب ڕوویەکێ گەش گۆتە هەڤالێن خۆ: بلا ئەم نەورۆزا ئەڤ سالە د جەرگێ زیندانێ دا ساخ بکەین. دا ببیتە سیمبۆلا بەرخودانێ. ب ئێک دەنگ بڕیارەکا گران دان. چەند ڕۆژان بەری جەژنێ، وی گەنجی ب بزمارەکا ژەنگگرتی ل سەر دیوارێن زیندانێ دەست ب کێشانا وێنەیان کر؛ وێنەیان دەربڕین ژ ئاگرێ نەورۆزێ، دیلان، سەیران، سروشتێ بهارا کوردستانێ و تێکۆشینا گەلێ کورد دکر. پاشان ب دەستخەتەکێ جوان ل ژێر وێنەیان نڤیسی: پیرۆز بیت جەژنا نەورۆزێ… بژیت کورد و کوردستان!
د وی دەمی دا، ب دەنگێ خۆ یێ زەلال دەست ب گۆتنا سروودەکا نەتەوەیی کر و هەڤالێن وی ژی ب هەڤرا لێ ڤەگێڕا و دەست دقوتان. بۆ چەند کێلیکان، زیندان ژ جهەکێ ستەمێ و تاریاتییێ بۆ مەیدانەکا تژی ڕۆناهی و هیڤی و گوهۆڕین هاتە ڤەگوهاستن. پلانەکا سادە بوو، لێ هەلگرا خەونا ملەتەکی بوو. بەلێ کەیفخۆشییا وان درێژە نەکێشا؛ ژ نیشکەکێڤە سیبەرا بێهنا لەرزینێ ب سەر وان دا فڕی و باری، تاکو زێرەڤانێن دوژمنی ب تووڕەییەکا درندانە ڕژانە ژۆر.، ب لوولەکێن تفەنگان دیوار کونکرن تاکو تەڤ وێنە شێواندن.
پاشان گەنجێ بەهرەمەند بۆ ژۆرا تاکە کەسی برن و ب دژواری ئەشکەنجە دا. پشتی زڤڕاندیە ناڤ هەڤالێن وی، لەشێ وی یێ بریندار بوو، لێ مۆرالا وی مینا چیایی یا بلند بوو؛ وی جارەکا دی و ب دەنگەکێ بلندتر هەمان ستران گۆتەڤە. ئەڤ جارە زێرەڤانان ئەو دگەل خۆ برن و نە ڤەگێڕاندن؛ ب کینەکا ڕەش و دلڕەقییەکا بێ سنوور هێرش کرە سەر؛ و ب دلڕەقییەکا سار ئەو چرایا گەشا ملەتەکی ب بێ دلۆڤانی شەهید کر.
تەنێ دەستمالەکا ڕەنگین یا ب خوینێ سۆربووی ل دووڤ وی ما بوو. زێرەڤانان ئەو دەستمال، مینا نیشانەکا ترسێ، هاڤێتنە بەر هەڤالێن وی، لێ ئەو پارچە پەڕووك نەبوو ئەگەرێ ترسێ، بەلکو بوو ئالایەکێ نوی یێ شۆڕەشێ. دەمێ هەڤالێن وی نۆچەیێ شەهیدبوونا وی زانین، دلێن وان سۆتن؛ لێ چۆك نە دانان، و سەرێ خۆ بۆ دوژمنی نەچماندن. ب چاڤێن بێ ترس و تژی ژ قارەمانییێ، هەمان ستران دوبارە گۆتنەڤە و دەنگێن وان دیوارێن زیندانێ هەژاندن. ئەو سترانە ب تنێ بۆ جەژنەکێ نەبوو؛ بۆ ئازادیێ بوو، بۆ کوردستانێ بوو، و بۆ تەڤ وان مرۆڤان بوو یێن دژی زۆردارییێ و کوشتنا ژیانێ ڕادوەستن.
