خەلکـێ ئیرانـێ خـوە بۆ قووناغەکـا دژوار بەرهـەڤ دکـەن
رێکخستنا مافێن مرۆڤی یا ئیرانێ دیار دکەت ژ بەر گەفێن ترامپی چەند رۆژن ل باژێرێن مەزن یێن ئیرانێ د مارکێتان دا کەلوپەلێن خوارنێ نەماینە و ل گەلەک جهان ژی ب چەند قات گرانتر دهێنە فرۆشتن و خەلک خوە بۆ قووناغەکا دژوار بەرهەڤ دکەن.
رێکخستنا مافێن مرۆڤی یا ئیرانێ دیار کریە پشتی گەفێن ترامپی یێن بۆ وێرانکرنا ژێرخانا ئابووری یا ئیرانێ ل باژێرێن مەزن یێن ئیرانێ نها رەوشەکا نەئاسایی هەیە و چەند رۆژن خەلک یێ کەلوپەلێن سەرەکی یێن ژیانێ بۆ خوە عومبار دکەن و نها ل پرانیا مارکێتێن باژێرێن مەزن یێن وەکو تەهران، ئیسفەهان، شیراز، مەشهەد و گەلەک باژێرێن دی د مارکێتان دا کەلوپەلێن خوارنێ نەماینە و هەروەسا بهایێ کەلوپەلان ژی گەلەک گران بووینە و ل هندەک مارکێتان ب چار قات گران دهێنە فرۆشتن.
هەمان رێکخستنێ ئەو یەک ژی دیار کریە، ژ بەر گەفێن ترامپی نها ل گەلەک باژێران هێلێن شەمەندەفران هاتینە راوەستاندن و خەلک نەوێرن هاتنوچوونێ بکەن و هەروەسا ب هزاران وەلاتیێن ئیرانێ بەرێ خوە داینە باژێرێن بچووک یان ژی گوندان دا وەسا ژ ئێرشان دوور بن.
رێکخستنا مافێن مرۆڤی سەبارەت ب دەڤەرێن کوردی ژی دیار کریە، رەوش ل باژێرێن رۆژهەلاتێ کوردستانێ ژی باش نینە، چونکی چەند رۆژن چەکدارێن حەشدا شەعبی ل هندەک باژێرێن رۆژهەلاتێ کوردستانێ بجه بووینە و خەلک وەسا هزر دکەن دێ شەڕ روو دەت و ژ بەر ڤێ یەکێ ژی خەلک بۆ پاراستنا خوە یا پێدڤی دکەن و کەلوپەلان عومبار دکەن و ل باژێرێن کوردی ژی کەلوپەلێن خوارنێ گەلەک گران و کێم بووینە.
ئەو یەک د دەمەکێ دایە کو دوهی ئیسماعیل بەقایی پەیڤدارێ وەزارەتا دەرڤە یا ئیرانێ دیار کر، وان داخوازیێن ئەمریکا یێن بۆ راگرتنا شەڕی رەت کرینە و دڤێت ئەمریکا و ئسرائیل ئێرشێن خوە بدەنە راگرتن و قەرەبۆیا خەلکێ ئیرانێ ژی بکەن و هەروەسا هەکە ئێرشی ژێرخانا ئابووری یا ئیرانێ بهێتە کرن ئیران ژی دێ هەمان تشتی کەت و دێ ئێرشی ژێرخانا ئابووری و وزێ یێن وەلاتێن هەڤپەیمانێن ئەمریکا ل دەڤەرێ کەت.
چاڤدێرێن سیاسی ژی دیار دکەن، د رەوشا نها دا راگرتنا شەڕی گەلەک زەحمەت دیارە، چونکی ئیرانێ نەڤێت راگرتنا شەڕی وەکو خوە رادەستکرن بۆ بهێتە حساب کرن و دڤێت شەڕی ل هەموو دەڤەرێ بەلاڤ بکەت و زیانێن مەزن بگەهینتە ئەمریکا و هەڤپەیمانێن وێ دا ئەمریکا نەچار بیت شەڕی بدەتە راگرتن و ل هەمبەر دا ئەمریکا و ئسرائیل ژی دخوازن رژێما ئیرانێ ژناڤ ببەن یان ژی رژێمێ نەچار بکەن دا خوە رادەست بکەت و ژ بەر ڤێ یەکێ ژی چو ئاماژە بۆ راگرتنا شەڕی نینن.
