دەزگەهێ خێرخوازی یێ بارزانی دێ هەوا بەرهنگاربوونا ماددەیێن هۆشبەر راگەهینیت
دهۆك، دلۆڤان ئاكرەیی:
سەرۆكێ دەزگەهێ خێرخوازی یێ بارزانی دیار كر، ب هەماهەنگی ل گەل وەزارەتا ناڤخۆ یا حكومەتا هەرێما كوردستانێ، پلانەكا هەڤپشك بۆ بلندكرنا ئاستێ هشیاریا جڤاكی دژی مەترسیێن ماددەیێن هۆشبەر هاتیە دارێشتن و د نێزیكترین دەم دا، خولێن راهێنانێ بۆ كارمەندێن وەزارەتێ دێ هێنە ڤەكرن.
موسا ئەحمەد، سەرۆكێ دەزگەهێ خێرخوازی یێ بارزانی بۆ رۆژنامەیا ئەڤرۆ گۆت: «شاندەكێ بلند یێ وەزارەتا ناڤخۆ سەرەدانا مە كر، مە ب هووری باس ل میكانیزمێن كارێ پێكڤەیی بۆ بەرهنگاربوونا ماددەیێن هۆشبەر د ناڤ جڤاكی دا كر و بڕیارە دەزگەهێ خێرخوازی یێ بارزانی ب درووشمێ پێكڤە بەرەف جڤاكەكێ ب هێز و ساخلەم ڤێ هەوا نشتیمانی بڕێڤە ببەت».
زێدەتر گۆت: «بۆ ڤێ مەرەمێ ستافەكێ شارەزا و بسپۆڕ هاتیە تەرخانكرن، وەزارەتا ناڤخۆ ژی وەكو لایەنەكێ سەرەكی دێ ڕۆلەكێ بەرچاڤ د سەرئێخستنا پڕۆژەی دا گێڕیت، پێخەمەت پاراستنا جڤاكی ژ ڤێ ئاتافا مەترسیدار».
