رێیا گوندێن دەڤەرا بەرێ گارەی هاتە ڤەكرن
ئامێدیێ، مەحمود نهێلی:
پشتی چەندین سالان رێك ب هەژمارەكا گوندێن دەڤەرا بەرێ گارەی هاتەدان، جارەكا دی بچنە سەر گوندێن خوە بۆ مەرەما چاندنێ، لێ ڤێجارێ رێنمایی و مەرج هاتینە دانان.
حازم ردێنی، خەلكێ دەڤەرا بەرێ گارەی و ئاكنجیێ سەنتەرێ ناوچەدارییا دێرەلۆكێ بۆ رۆژناما ئەڤرۆ دیار كر، پشتی وان دوهی 8/4/2026 كۆمبوونەك ل گەل بەهرام عریف یاسین، بەرپرسێ لقێ 18 یێ پارتی ل ئامێدیێ ئەنجام دای و دان وستاندن ل سەر ڤەكرنا رێكا گوندێن دەڤەرا بەرێ گارەی هاتیەكرن و گۆت: «مە وەكو خەلكێ وان گوندان داخوازییا خوە گەهاندیە وانا، رێك ب مە هاتەدان بۆ مەرەما كارێن چاندنێ قەستا سەر گوندێن خوە بكەین».
گۆت ژی: «ڤێ جارێ رێنامیی و مەرج بۆ مە هاتینە دانان و پێدڤیە ل دووڤ وان مەرج و رێنمایان كار بكەین، دیسا ئەڤ رێك دانە بۆ هەیاما ئێك هەیڤە و پشتی هەیڤەك تمام دبیت، جارەكا دی رێك دێ هێتە گرتن، دیسا دڤێت ب شەڤێ كەس ل وێ دەڤەرێ نەمینیت و ڤەگەرنە ناڤ جهێن ئاكنجی بوونێ».
ناڤهاتی دیار ژی كر، ڤەكرنا رێكا گوندێن وان كارەكێ باشە، بەلێ هەكە ئاڤ رێنمایێن نەمانا شەڤێ تێدا نەبان، دا گەلەك باشتر بیت، چونكی رێیەكا دوورە و ناگەهن بچن و ڤەگەرنەڤە و گۆت: «دڤێت رێكێن گوندان، ب تایبەت یا سەرەكی بهێتە پاقژكرن و كەڤرۆ بارێن مەزن ئەنجامێ بارانێ هاتینە د رێكێ دا بهێنە راكرن، ئەو جهێن خراب بووی بهێنە نووژەنكرن، دا هاتنوچوون تێدا ئاسایی ببیتە ڤە».
