ئه‌گه‌رێ رێكنه‌كه‌فتنا لايه‌نێن سياسى ل هه‌له‌بچه ئاشكه‌را دبيت
ئه‌ڤرۆ نیوز:
د ده‌مه‌كى دا كو به‌حس ل وێ چه‌ندێ دهێته كرن لایه‌نێن سیاسى ل هه‌له‌بچه نه‌گه‌هشتینه چو رێكه‌فتنان، به‌رپرسێ لقێ پارتى دیموكراتى كوردستان ل وێ پارێزگه‌هێ ژى ئاشكه‌را دكه‌ت كو ئێكه‌تیێ نه‌ڤێت چو پۆستان ب پارتى بده‌ت یێن هاتینه ده‌ستنیشانكرن.
فازل به‌شاره‌تى به‌رپرسێ لقا 12 یا پارتى دیموكراتى كوردستان ل هه‌له‌بچه بۆ باسنیوز گۆت: “ئێكه‌تى نشتیمانى كوردستان یا رازى نینه پۆستێ قایمقامیا ناڤه‌ندى یێ پارێزگه‌ها هه‌له‌بچه بۆ پارتى بیت، وه‌سان نینه وه‌كو دهێته گۆتن كو پارتى پۆستێ قایمقامیێ و سه‌رۆكاتیا جڤاتا پارێزگه‌ها هه‌له‌بچه وه‌رگریت”.
زێده‌تر گۆت: “د راستى دا مه پۆستێ قایمقامیا ناڤه‌ندى یا هه‌له‌بچه دڤێت، به‌لێ ژ به‌ر كو گه‌له‌ك هات و چوو، مه داخوازیا خوه بۆ پۆستێ سه‌رۆكاتیا جڤاتا پارێزگه‌هێ گوهۆڕى، به‌لێ ئێكه‌تى ب وێ ژى رازى نابیت”.
دا زانین ژى كو ئێكه‌تى نشتیمانى كوردستان پێ خۆش نینه چو ژ وان پۆستان ب پارتى دیموكراتى كوردستان بهێته دان و گۆت: “پارتى یا رازى یه ئێك ژ هه‌ردو پۆستان ب پارتى بهێته دان”.
