مەسرور بارزانی و وەزیرێ ناڤخۆیێ ئەمریكا پێشڤەبرنا پەیوەندیێن هەولێرێ و واشنتۆنێ گەنگەشەكرن
مەسرور بارزانی، سەرۆكێ حوكمەتا هەرێما كوردستانێ و دۆگ بورگوم، وەزیرێ ناڤخۆ یێ ئەمریكا د پەیوەندییەكا تەلەفۆنیدا پەیوەندیێن د ناڤبەرا هەولێرێ و واشنتۆنێ دا گەنگەشە كرن.
مەسرور بارزانی، سەرۆكێ حوكمەتا هەرێما كوردستانێ ل سەر هەژمارا خۆ یا تورا جڤاكییا (X – تویتەرێ بەرێ) بەلاڤكر: «ل گەل دۆگ بورگوم، وەزیرێ ناڤخۆ یێ ئەمریكا، مە گەنگەشە ل دۆر پێشئێخستنا پەیوەندیێن دووقۆلی د بوارێ وزەیێ دا و رۆلێ ئەرێنی یێ كۆمپانیێن ئەمریكی د پشتەڤانییا پێشەسازییا وزەیێ دا كر».
مەسرور بارزانی نڤیسیە: «من سوپاسییا پشتەڤانییا بەردەوام یا ئەمریكا كر و داخوازا پاراستنا هەرێما كوردستانێ و ب دووماهیئینانا هێرشێن تیرۆرستی بۆ سەر ژێرخانەیا وزەیێ كر».
هەڤدەم حوكمەتا هەرێما كوردستانێ بەلاڤكر كو مەسرور بارزانی و دۆگ بورگوم «بیروڕا ل سەر رەوشا ئەمنی و ئابووری یا هەرێما كوردستانێ و ئیراقێ د بن سێبەرا ئاگربەستا د ناڤبەرا ئەمریكا و ئیرانێ دا لێكگۆهارتن».
وەك حوكمەتا هەرێما كوردستانێ دبێژیت، «وەزیرێ ناڤخۆ یێ ئەمریكا سوپاسی و پێزانینێن خۆ بۆ سەركردایەتیكرن و پشتەڤانییا سەرۆكێ حوكمەتا هەرێمێ د بابەتی وزەیێ دا دیار كرن».
د راگەهاندنێ دا هاتیە: «سەرۆكێ حوكمەتا هەرێمێ سوپاسییا پشتەڤانییا بەردەوام یا ئەمریكا كر و داخوازا پاراستنا هەرێما كوردستانێ و ب دووماهیئینانا هێرشێن تیرۆرستی بۆ سەر ژێرخانەیا وزەیێ كر و دووپاتی ل سەر وێ چەندێ كر كو هەرێما كوردستانێ پێگیرە ب كاركرنێ پێخەمەت ب دەستڤەئینانا ئاشتی و خوشگوزەرانیێ د دەڤەرێ دا».
