خەمێن خۆڤەدز
عەبدولقادر حەمید ئورمانی
هەڕۆ ل میحرابا لیقائێ
مینا سیتاڤكا
تابلۆیەکێ خەمبار
مینا بەندەوارەکێ
پڕ وەستیایی
ل بن سیبەرا
ئازارێن خۆ
بێدەنگ و لڤین
دا بروینیتن
ئەو ….نە وەک
چ مرۆڤا بوو…
عاشقەکێ سەیر بوو
چ قولاچا خەم
لێ باریبان
دا وێ قولاچێ
ژێگریتن و
کەتە جڤات و
کەتە ئەیوان و
دا ب تنێ ل گەل
بیرهاتنێن خۆ
مینا ساویلکەیەکێ
ڕێ لێ بەرزە
وێرێ کەتە خەمگەهـ و
دا خوزیێن خۆ
لێ بچینیتن
دێمێ وی ژی
یێ جوان و
دویر ژ کەرب و
کین و نیفاقێ
ب سالا
خودیک نەدیت و
ئووو بەردەوام
ڕوندکێن کەل
ڕۆکێن وی
هەمبێز دکرن
شادی ژی
قەد نەدشییا
ل جڤاتا وی
یا خەمناک
دادەت و بمینینتن
ژ بەر ئازارێن خەریبیێ
چاڤێن وی یێن
پڕی شەوق
دناڤ سەری دا
زیق ببوون
ئاگرێ عشقا وی یا
ژ شێتییێ ژی
دەربازکری و وەک
شانۆگەرییەکا تراژیدی
بۆ وی ئالییێ
خەم ژێ بارین
دا هێدی هێدی چیتن
ئەڤ تابلۆیە
ژ دیرڤە بۆ بینەران
جوان دهاتە پێشاندان
لێ ناڤەڕۆک
ڕۆمانەک پر
خەمێن خۆڤەدز بوو
لێ…
ب تنێ ب چاڤێن
وەفادار و بەندەواران
چاڤێن عاشق و
دلنازک و خەمباران
ب دروستی وڕۆهنی
ڕەنگ و ناڤەڕۆک
د هاتنە دیتن.
