رێککـەفتنەکـا نوو د ناڤبەرا شـامێ و رێڤەبەریا خوەسـەر دا هـاتە ئیمـزا کـرن
بەرپرسەکێ حوکمەتا سووریێ دیار دکەت کو د سەرەدانا ڤێ دووماهیێ یا فەرماندارێ هەسەدێ بۆ شامێ دا رێککەفتنەکا نوو د ناڤبەرا شامێ و رێڤەبەریا خوەسەر دا هاتیە ئیمزا کرن و هەموو مافێن کوردان ل سووریا نوو دا دێ هێنە گەرەنتیکرن.
بەرپرسەکێ حوکمەتا سووریێ کو ناڤێ وی نەهاتیە ئاشکرا کرن بۆ کەنالێ ئەل ئەخبار یێ سووریێ دیار کریە رۆژا ١٥ مەهێ دەمێ مەزلوم عەبدی سەرەدانا شامێ کریە ل گەل ئەحمەد شەرع و وەزیرێ دەرڤە ئەسعەد شەعبانی کۆمبوویە و د کۆمبوونێ دا بەحسێ رێککەفتنەکا نوو هاتیە کرن و هەر دو ئالی ل سەر ٥ سالان رێککەفتینە، ل گۆ رێککەفتنێ دێ هەموو فەرمانبەرێن رێڤەبەریا خوەسەر بنە فەرمانبەرێن دەولەتێ و دێ دەولەتا سووریێ ماف و شایستەیێن دارایی بۆ وان دابین کەت، هەروەسا کورد دێ د هەموو سازیێن سیاسی و خزمەتگوزاریێ یێ دەولەتا سووریێ دا پشکدار بن، هێزێن هەسەدێ دێ وەکو خوە مینن لێ دێ ل هەموو دەڤەرێن سووریێ خزمەتێ کەن، هەروەسا ٤٠٪ ژ داهاتێ ل دەڤەرێن کوردێ دێ بۆ ئاڤەدانیا وان دەڤەران هێتە تەرخانکرن.
هەمان بەرپرسی ئەو یەک ژی دیار کریە کو د کۆمبوونێ دا داخواز ژ مەزلوم عەبدی هاتیە کرن کو ببیتە جێگرێ سەرۆک کۆمارێ سووریێ، لێ ئەو یەک ژ ئالیێ مەزلوم عەبدی ڤە هاتیە رەتکرن.
سەبارەت ب رێککەفتنێ و داخوازیێن شامێ هەتا نها بەرپرسێن رێڤەبەریا خوەسەر چو داخویانی بەلاڤ نەکرینە، لێ بەری چەند رۆژان پارێزگارێ حەسەکێ دیار کربوو کو ل گۆر رێککەفتنا ل گەل شامێ دێ هەموو فەرمانبەرێن رێڤەبەریا خوەسەر بنە پشکەک ژ فەرمانبەرێن دەولەتێ و دێ ل هەموو سازیێن دەولەتێ کار کەن و دێ مووچە و شایستەیێن وان یێن دارایی ژی ژ ئالیێ دەولەتا سووریێ ڤە هێتە دابین کرن.
ل ئالیێ دی چەند رۆژن ل رۆژئاڤایێ کوردستانێ بەحسێ ڤێ یەکێ دهێتە کرن کو مەزلوم عەبدی فەرماندارێ گشتی یێ هەسەدێ دڤێت پارتەکا نوو یا سیاسی یا کوردستانی ئاڤا بکەت و ل گەل هەموو هێز و ئالیێن سیاسی بەردەوامیێ بدەتە خەباتا سیاسی بۆ بدەستڤەئینانا مافێن رەوا یێن گەلێ کورد.
هەتا دەمی ئامادەکرنا ڤێ راپۆرتێ نە مەزلوم عەبدی و نە ژی چو بەرپرسێن رێڤەبەریا خوەسەر سەبارەت ب رێککەفتنا نوو یا ل گەل شامێ چو داخویانی بەلاڤ نەکرینە و هەروەسا چو سازیێن فەرمی یێن دەولەتا سووریێ ژی بەحسێ رێککەفتنا نوو یا ل گەل هەسەدێ نەکرینە، لێ ب گشتی دەزگەهێن راگەهاندنا سووریێ ئاماژە ب ڤێ یەکێ دکەن کو نها چو پرس د ناڤبەرا شامێ و هەسەدێ دا نەماینە و رێککەفتنا بەری نها یا د ناڤبەرا شامێ و هەسەدێ دا بوویە ئەگەر رەوشا سووریێ ب گشتی یا ئارام بیت.
