بۆ جارا ئێكێ ناڤەندا خانی ئەپلیكەیشنێ خانی ئەی ئای بەرهەم دئینیت
نهێل خەلیل كەمال، شارەزا و بسپۆر د وارێ ئەی ئای دا، بۆ رۆژناما ئەڤرۆ گۆت: من ب هەڤكاریا محەمەد ئیحسان ئامێدی شارەزا و بسپۆر د وارێ ئەی ئای دا، ئەم رابووینە ب چێكرنا پرۆژێ ئەپلیكەیشنێ خانی ئەی ئای، كو بۆ جارا ئێكێ ئامرازەكێ ژیرییا چێكری یێ كوردی كو د ئاخڤتنا مە یا رۆژانە ب زاراڤێ بەهدینی دگەهیت و بۆ تە دكەتە نڤێسینەكا دروست و ئەكادیمی، ژیرییا چێكری یا خانی پرۆژەكێ نوو یێ تیما ژیرییا دەستكرد یا ناڤەندا خانی یا رەوشەنبیری و راگەهاندنێ یە، بۆ جارا ئێكێ ل سەر ئاستێ هەرێما كوردستانێ و ب تایبەتی ل دەڤەرا بەهدینان ئەپلیكەیشنەكێ زیرەك دهێتە دورستكرن، كو دو زمانان تێكهەلی ئێك نەكەت، ئەڤ سیستەمە نە ب تنێ وەرگێرەكە، بەلكو شارەزایی دابونەریت، كلتۆر و جوگرافیایا دەڤەرا مە یە و ب پاقژترین شێوە یێ زاراڤێ بەهدینی هزر دكەت و بەرسڤێ ددەت بێی تێكەلهەكرنا زاراڤان، ب دەنگی پرسیارێ ژێ بكە، ئەو دێ ب نڤێسین بەرسڤا تە دەت،هەروەسا دشێت وێنەیان دروست بكەت و نڤێسینا كوردی ب رێزمانەكا دروست ل سەر دانیت، دیسان بۆ شلۆڤەكرنا فایلان، نڤێسینا بابەتان، وەرگێرانەكا هوور بۆ هەموو زمانێن جیهانی یێ ئامادەیە، ل گەل هندێ ئەڤ پلاتفۆرمە ب تەمامی بێ بەرامبەرە و چ تێچوویەكێ دارایی ل سەر بكارهێنەرێ نینە، ئەڤە دیارییەكە بۆ خزمەتا خەلكێ مە و زمانێ مە، زمانێ خۆ، ب تەكنەلۆژیا سەردەم ب پارێزە، وەك هەر سیستەمەكێ ژیرییا چێكری كو ل سەر بنەمایێ داتایان كار دكەت.
ناڤهاتی گـــــۆت: خانـــــــی ئــــــەی ئــــــای ئەپلیكەیشنەكێ زیرەكە، هەڤبەركرن ل گەل هەموو ئەی ئایێن بوری و یێن نوكە هەین ئەوە، كو ئەم زمان و كلتۆرێ خۆ جودا ددانین ژ وانا و هەموو ئەی ئای ژی ل سەر بنەمایێن داتایان دهێنە بكارئینان، خانی ئەی ئای ژی یا شیایی ئەپلیكەیشنەكێ فەرمی دروست بكەت و داتایێن خۆ یێن دروست بدەتە خانی، خانی ژی ب رێیا وان داتایان دشێت بەرسڤا خەلكی بدەت، بۆ نموونە رۆژناما ئەڤرۆ مە یا كرییە، سایتێ ژێدەرێ سەرەكی یێ نووچەیان د خانی ئەی ئای دا، دەمێ كەسەك بچیت و بێژیتێ ئەڤرۆ چ نووچە هەنە، ئەو دێ حەفت هەشت نووچەیان دەتێ، ل دووماهیێ دێ ژێدەران ژی دیاركەت، داكو باوەری بۆ چێبیت، ل دەستپێكێ دێ رۆژناما ئەڤرۆ بیت، چنكی رۆژنامە ئێكە ژ سازیێن ناڤەندا خانی، مە ڤیایە گرنگیەكا باش بدەینێ، دیسان مە 53 پەرتووكێن ناڤەندا خانی ژی، مە كرینە ژێدەرێن نڤێسینێ، مە گەلەك گرنگی ب لایێ زمانی دایە، یا گرنگ بوو ئەم رۆلێ نڤیسەرێ خۆ د زاراڤێ بەهیدینی دا، ب ژیرییا چێكری بكار بینین، مە ل سەر ڤێ خالێ ژی كاركریە، ئەڤ ئەپلیكەیشنە ل سەر هەرسێ سیستەمان، ئایۆ ئێس، ئەندریۆد و وێب ( كۆمپیۆتەری) كاردكەت، ب ناڤێ خانی ئەی ئای، رۆژانە ژی سێ دەمژمێران ئەم ددەینە ڤی كاری.
