پاشەرۆژا کوردان ل سووریێ یا دیار نینە
ئاژانسەکا جیهانی دیار دکەت ئەمریکا کورد ل سووریێ ب تنێ هێلان و کوردان گەلەک ژێدەرێن وزێ ژ دەستدان و گوهۆڕینێن ل دەڤەرێ و سووریێ بووینە ئەگەرێ دلگرانیا کوردان ل وی وەلاتی و کورد هەست دکەن کو پاشەرۆژا وان ل سووریێ یا دیار نینە.
ئاژانسا رویترز د راپۆرتەکێ دا بەحسێ ڤێ یەکێ کریە کو ئەمریکا ل سووریێ ژ بەر بەرژەوەندیێن خوە کورد ب تنێ هێلان، کوردێن سووریێ بۆ دەمێ ١٤ سالان هەڤپەیمانێ ستراتیژی یێ ئەمریکا بوون و د شەڕێ ل دژی داعشێ دا ب هزاران قوربانی دان، لێ پشتی کو ئەمریکا پشتەڤانیا ئەحمەد شەرعی کر و ئەو هاتە سەر دەستهەلاتێ، ئێدی رەوش ب تەمامی ل دژی کوردان هاتە گوهۆڕین و نوونەرێ ئەمریکا بۆ کاروبارێن سووریێ ئانکو تۆم باراک ب رەنگەکێ ئاشکرا گەف ل کوردان کرن کو دڤێت ل گۆر داخوازیێن ئەمریکا قەبوول بکەن ببنە پشکەک ژ جڤاک و دەستهەلاتا سووریێ، نها کورد ل سووریێ ئەو تشتێن دخواستن بدەستڤە نەئیناینە و مەترسی ل سەر پاشەرۆژا کوردان ل سووریێ هەیە.
هەمان ئاژانسێ ئەو یەک ژی دیار کریە، د چارچۆڤێ پرۆژەیا ب ناڤێ ئینتگراسیۆنێ دا بزاڤ دهێتە کرن هەموو سازیێن کو بەری نها ل ژێر دەستهەلاتا رێڤەبەریا خوەسەر یا کوردان دا بوون ببنە پشکەک ژ سازیێن دەولەتا سووریێ و بێگومان وی دەمی چو تایبەتمەندیێن کوردی نامینن، هەروەسا بزاڤا ڤێ یەکێ دهێتە کرن کو هێزێن سەربازی یێن کوردی ژی ببنە پشکەک ژ لەشکرێ سووریێ، وی دەمی هەکە د پاشەرۆژێ دا جارەکا دی شام سۆزێن خوە بجه نەئینیت و توندوتیژیێ ل دژی کوردان بکار بینیت دێ مەترسی ل سەر کوردان دروست بن، چونکی هەتا نها ژی باوەریا کوردان ب دەستهەلاتا شامێ نینە و کوردان دڤێت وەکو نەتەوە و پێکهاتەیەک جودا ل سووریێ بژین، لێ ئەمریکا رێ نەدا تشتەک وەسا ل سووریێ دروست ببیت و کورد نەچار مان ب مافەکێ گەلەک کێم یێ سیاسی و جڤاکی و کەلتوری رازی بن.
ئەو یەک د دەمەکێ دایە کو بەری نها بەرپرسەکێ حوکمەتا سووریێ دیار کربوو کو ل گۆر رێککەفتنا د ناڤبەرا شامێ و هەسەدێ دا ئێدی دڤێت هەسەدە بهێتە هلوەشاندن و شەرڤانێن هەسەدێ دێ چنە ناڤ لەشکرێ سووریێ.
چاڤدێرێن سیاسی ژی دیار دکەن، هەتا نها چارەنڤیسێ ب هزاران چەکدارێن ژن ل رۆژئاڤایێ کوردستانێ دیار نینە کو بەری نها وەکو یەپەژە خوەدان هێزەکا چەکدار یا تایبەت بوون، هەروەسا گەلەک خالێن دی یێن رێککەفتنا ل گەل شامێ ژی ب دلێ کوردان نینن و کوردێن سووریێ نزانن کا دێ پاشەرۆژا وان چ بیت و مەترسی هەیە چەکدارێن شامێ جارەکا دی ئێرشی کوردان بکەن.
