دەمێ كەڤال ب دووماهی دهێت ئەز هەست ب خۆشیەكا زێدە دكەم
شاكر ئەتروشی
جیهان محەمەد عەلی، شێوەكارا بەرنیاسا رۆژئاڤایێ كوردستانێ د دیدارەكێ دا بۆ رۆژنامەیا ئەڤرۆ گۆت: دەمێ ئەز ل وەلاتێ خۆ هەتا رادەیەكی كاركرن بۆ ئافرەتێ د بۆارێ هونەری دا یا ب زەحمەت بوو، ئانكو هندەك ئاستەنگ و نەخۆشی هەبوون، لێ پشتی ژ نەچاری ئەم ژوەلاتێ خۆ دەركەفتین و پشتی گەهشتینە وەلاتێ (نەمسا) من هەستپێكر نوكە پتر ئەز یا ئازادم و دێ شێم خەونێن خۆ بجه ئینم، لەورا ل باژێرێ نوكە ئەز لێ دژیم، كو ئەو ژی (ڤیەنا) یە، پایتەختێ وەلاتێ نەمسا، ب هەموو هێز و شیانێن خۆ من دەستپێكر و مالبات ژی هەموو دهاریكاربوون، لەورا هەتا نوكە ئەز یا بەردەوامم.
هەروەسا گۆت: ناڤەرۆكا پتریا كەڤالێن من ل دۆر سروشتێ جوانێ كوردستانێ نە و دەمێ كەڤال ب دووماهی دهێت ئەز هەست ب خۆشیەكا زێدە دكەم، بۆ زانین هەتا نوكە من پشكداری د هژمارەكا پێشانگەهان دا كریە، لڤی وەلاتی و گەلەك وەلاتێن ئورۆپی و عەرەبی ژی، نوكە ژی ئەم یێ خۆ بەرهەڤ دكەین بۆ چەند پێشانگەهان ل وەلاتێن (نەرویج، فیلەندا، كویت، قەتەر، جەدە) و بتنێ یا مای ژڤانێ رۆژا ڤەكرنێ بهێتە دیاركرن.
ل دووماهیێ جیهانێ گۆت: مە كوردان شێوەكارێن باش ل هەر چار پارچەیێن كوردستانێ، هەروەسا ل هەموو وەلاتان هەنە و خودان سەربۆر و ئەزموونێن باشن دبۆارێ شێوەكاری دا، هەروەسا كەڤالێن وان ب بهایێن باش هاتینە فرۆتن، لێ هەكە پتر پشتەڤانی بۆ وان هەبیت، دێ پتر هونەرمەندێن بهێز دیاربن.
