ژ بەر ڕێگریێ ل كارێن مە نووژەنكرنا رێكا بەردەرەشـێ راوەستایە
رەمەزان زەكەریا:
رێڤەبەرێ پارستن و سەخبێریا رێك و پران ل ئاكرێ دیار كر، ژ بەر رێگریێ كارێ نووژەنكرنا رێیا بەردەڕەشێ بۆ كەلەكێ هاتیە راوەستاندن.
ئەندازیار محسن میرانی، رێڤەبەرێ پارستن و سەخبێریا رێك و پران ل ئاكرێ بۆ ئەڤرۆ گۆت: «مە دخواست كارگەها قێری یا ئاسنگەران بدەینە كاری، داكو پێدڤی ب كڕینا قێری ژ دهۆكێ نەبین، بەلێ مخابن خەلكێ گوندێ پیرچاوش ڕێگری ل كاركرنا كارگەهێ كریە و ناهێلن كار بهێتە ئەنجامدان، ئەڤە ژی بوویە ئەگەر نووژەنكرنا رێیا سەرەكی یا بەردەڕەشێ بۆ كەلەكێ بهێتە راوەستاندن».
گۆت ژی: «داخوازێ ژ خەلكێ دەڤەرێ و گوندیێن پیرچاوش دكەین، د هاریكار بن و ڕێگریێ ل نووژەنكرنا رێكا سەرەكی یا بەردەڕەشێ بۆ كەلەكێ نەكەن، ژ بەركو یا پێدڤیە بهێتە نووژەنكرن، بۆ ڕێگریكرن ل كارەساتێن هاتنوچوونێ».
