لژنەیەك بـۆ دووڤچوونا چارەنڤیسێ ب سەدان كەسێن ئێزدی دێ هێتە پێكئینان
دهۆك، لەزگین جۆقی:
رێكخراوا بەتریكۆر بۆ مافێن مرۆڤی ل شنگالێ دیاركر كو خەلكێ شنگالێ د ناڤ بێ ئۆمێدیێ دا چاڤەڕێی چارەنڤیسێ روفاتێن قوربانیێن جینۆسایدا شنگال دكەن، كو هەتا نوكە 857 روفات ژ گۆڕێن بكۆم هاتینە دەرئێخستن و ب تنێ ناسنامەیێن 296 ڕوفاتان ئاشكرا بووینە و هاتینە ڕادەستكرن بۆ كەسوكارێن قوربانیان و هێشتا 561 ڕوفات ل نۆشداریا داد ل بەغدا ماینە و ناسنامەیێن وان ئاشكرا نەبووینە.
خەیری عەلی، بەرپرسێ رێكخراوا بەتریكۆر بۆ مافێن مرۆڤی ل شنگالێ بۆ ئەڤرۆ دیاركر كو پشتی بۆرینا چەندین سالان ژ جینۆسایدا شنالێ ل سالا 2014ێ، هەتا نوكە ڕوفاتێن گەلەك كەسان د ناڤ گۆرێن بكۆم دا ماینە و نەهاتینە دەرئێخستن.
خالد سەیدو، ئەندامێ پەرلەمانێ ئیراقێ بۆ ئەڤرۆ دیاركر كو سەرۆكایەتیا پەرلەمانێ ئیراقێ ب فەرمی لژنەیا ساخلەمییێ ڕاسپارد بۆ ڤەكۆلین و دووڤچوونێ ل دۆر كەیسا ڕوفاتێن قوربانیێن ئێزدی، ب تایبەت ئەوێن ماینە ل نۆشداریا داد ل بەغدا و گۆت: «ئەڤە چەندین سالن، ب سەدان ڕوفاتێن قوربانییێن كۆمكوژییا سالا 2014ێ ل نۆشدارییا داد ل بەغدا د ناڤ بەفرگران دا ماینە و چارەنڤیسێ وان دیار نەبوویە».
