مزگینیەك بۆ ئەوێن دو زارۆكێن خودان پێدڤییێن تایبەت هەبن
زنار تۆڤی:
وەزیرا كار و كاروبارێن جڤاكی یا حكومەتا هەرێما كوردستانێ راگەهاند: ل دووڤ رێنومایێن نوو، ئەگەر دایك و بابەكی دو زارۆكێن ئۆتیزمێ یان فالنجا مەژی هەبن، هەردو پێكڤە دشێن مۆلەتا بخودانكرنێ ب مووچەیێ تەمام و دەرمالەیێن جێگیر وەربگرن.
كوێستان محەمەد، وەزیرا كار و كاروبارێن جڤاكی گۆت: «یاسایا هەژمارە 22 یا سالا 2011ێ هاتیە راستڤەكرن و ئاسانكاریێن مەزن بۆ وان فەرمانبەران هاتینە كرن یێن زارۆكێن خودان پێدڤیێن تایبەت هەین، نوكە دایك و باب دشێن پێكڤە مۆلەتێ وەربگرن بۆ بخودانكرنا زارۆكێن خۆ، ئەگەر هەژمارا زارۆكێن كێم ئەندام د خێزانێ دا دو زارۆك بن».
گۆت ژی: «ئەگەر دایك نەفەرمانبەر بیت، بەلێ یا نەخۆش بیت، یان ژی ژییێ زارۆكێ كێمئەندام ژ 12 سالان پتر بیت، ل وی دەمی باب دشێت مۆلەتا بخودانكرنێ ل فەرمانگەها خۆ وەربگریت».
