سەربەرست لەزگین: سێمێل ل دەڤەرا بەهدینان بوویە ژێدەرەكێ پشتەڤانیێ ب تایبەت بۆ پارتی کو روودان و دیرۆك دەرباز كرینە
دوهی د ڕێورەسمەكێ ڕێزلێئینانێ دا مەكتەبا ڕێكخستنا پارتی دیموكراتی كوردستان ل پارێزگەها دهۆكێ تیما فوتبۆلا یانەیا سێمێل خەلاتكر، پشتی شیایی ب سەرفەرازی ژ خولا پلا ئێكا كوردستانێ دەربازبنە پلا نایاب وەكو چارەم نوونەرا پارێزگەهێ پشتی هەر ئێك ژ یانەیێن زاخۆ، ئاكرێ و دهۆكێ.
لدۆر ڤێ خەلاتكرنێ و دچوارچووڤەیێ ڕێورەسمان دا سەربەست لەزگین بەرپرسێ ڕێكخستنا پارتی ل بەهدینان گۆت: ب ناڤێ مەكتبا ڕێكخستنێ و هەموو هەڤالێن ئامادەبووی پیرۆزباهیەكا گەرم ئاراستەیی كارگێری و ڕاهێنەر و یاریزانێن یانەیا سێمێلێ دكەین كو شیاین دەستكەڤتەكێ گرنگ و سەركەڤیتە پلا نایابا كوردستانێ، ئەڤە بخوە جهێ شانازیێ یە بۆ خەلكێ دەڤەرا بەهدینان و دەڤەرا سێمێل و جهێ وێ یێ دروست ئەوە كو پێش بیت، پێخوەشحالین وەكو مەكتەبا ڕێكخستنێ ڕێزگرتنێ ل ڤێ یانێ بكەین و كارگێرییا ئەڤە دەمەكێ درێژە كاركرین و ئەڤرۆ ژی بەرهەمێ وان دیاربوویە.
هەروەسان ناڤهاتی گۆت: ئەڤ جهێ ئەم لێ مالا هەوەیە و بارەگایێ هەوەیە و بەرهەڤبوونا هەوە جهێ دلخوەشیا مەیە و ئەم هەموو تەمامكەرێن ئێكین بۆ خزمەتا گەل و وەلاتێ خوە، سێمێل دیرۆكەكا گەلەك گرنگ یا هەی یا شۆرەشگێریێ و خۆراگریێ یا هاریكاریێ نە بتنێ د بوارێ وەرزشێ دا، ئەگەر سێمێل سەرۆكانیەك بیت بۆ یاریزانێن ئاستین بلند، ل دەڤەرا بەهدینان بوویە ژێدەرەك پشتەڤانیێ بۆ دەڤەرێ تایبەت بۆ پارتی دیموكراتی كوردستانێ د روودان و دیرۆكێ دا دەرباز كرییە.
ژلایەكێ دووڤە سەربەست لەزگین ئەوچەندە ژی گۆت: سێمێل ئەو جهـ بوویە پشتەڤانیەكا گرنگ یا ئابۆری پێشكێشی دەڤەرێ كرییە، وەرزش كەرتەكێ گەلەگ گرنگە، ئەم وەكو پارتی دیموكراتی كوردستان، وەكو مینهاج و بیروباوەرێن خوە هەموو دەمان ئەم بزاڤێ دكەین پشتەڤانییا وەرزشێ بكەین و بوو هەموو جورێن وەرزشێ نە بتنێ فوتبۆلێ و پشتەڤان بین و دەلیڤا بۆ هەموو گەنجێن خوە پەیدا بكەین كو شیانێن خوە تێدا دیاربكەن.
ژلایەكێ دووڤە ناڤهاتی ئەوچەندە ژی دیاركر كو ژبەر كاودانێن دەڤەرێ ئاستەنگ هەبووینە و گۆت: مخابنڤە ئەوا مە بڤێت و حەز وڤیان هەی ژبەر كاودان و كێشەیێن رووبەرۆیی كوردستانێ دبیت ڕەنگە مە نەشیا بیت ئەوا پێدڤی و ئەوا ئاستێ مە بڤێت پێشكیش بكەین ژبەر گەلەك ئەگەرێن ناڤخۆیی و دەرەكی، لێ سەر وان هەموو ئاستانگان، سۆپاس بۆ خودێ گەنج و وەرزشڤانێن مە هەموو دەمان ئاست پێش دئێخن، ئەڤە یانەیا چارێ یە یا پارێزگەهێ دنایاب دا.
هەروەسان پەرپرسێ مەكتەبا ڕێكخستنا بەهدینان گۆت: ژلایێ مەڤە خولێن كوردستانێ گرنگییەكا تایبەت هەیە، گرنگییا وێ گەلەك بلندترە ژ ئەوا خولێن بلندتر ئاست دكەن یێن ئیراقێ و نێڤدەولەتی، چنكو پێگەهاندن و چێكرن و بلندكرنا ئاستێ یاریزانان ل ئەڤان یانەیێن ناڤخۆیی دەستپێدكەن و یانەیا سێمێل بوویە ژێدەرەكێ پشتەڤانی بۆ یانەیا دهۆكێ ب یاریزانان، هەروەسان چەند یانەیێن دی ژی هەنە ل سەر ئاستێ ئیراقێ یاریزانێن سێمێلێ دناڤ دانە، ئەڤە ژی نیشانا هندێ ددەت هەكە گەنجێ مە دەلیڤە هەبیت شیانێن گەلەك باش هەنە و ئەڤە جهێ خۆشخالیێ یە، بڕێیا وەرزشێ كارەكێ مەزن دناڤ كۆمەلگەهێن نێڤدەولەتی دا دهێتە كرن ستوونەكا دروست یا كۆمەلگەهێ یە.
هەروەسان ناڤهاتی گۆت: وەكو پارتی ئەم ب ئەركێ خوە دبینن بەردەوام پشتەڤانێن كەرتێ وەرزشێ بین و تیمێن خوە یێن وەرزشی بین بێخەمەت شیانێن وەرزشڤانێن مە پێشبكەڤن، ئەڤە ژی نە منەتە بەلكو ئەركە ل سەر مللێن مە وەكو پارتی و حوكمەتا هەرێما كوردستانێ بجهبینن، وەرزش ڕێزگرتنە و تەندروستیە و پێگیریكرنە پێدڤییە ب گیانەكێ وەرزشی نە بتنێ دناڤ وەرزشێ دا هەبیت بەلكو دناڤ تاكە خەلكێ كوردستانێ ژی داهەبیت، ل چڤاك و خێزان و هەموو دەڤەران دا هەبیت، مە باوەرییا بهێت بۆ سالا بهێت دێ ئاستێن باشتر بدەستڤەئینن، سێمێل بۆمە گەلەك یا كرنگە ئەم پێخوەشحالبووین ب دەستكەڤتێ سێمێلێ.
