تورکـیا ژ بۆ چـارەسـەرکرنا پرسـا کـوردی چـو پێنگـاڤ نەهـاڤێتینە
چاڤدێرێن سیاسی دیار دکەن هەتا نها دەولەتا تورکیا چو پێنگاڤ بۆ چارەسەرکرنا پرسا کوردی نەهاڤێتینە و گەلێ کورد ل تورکیا ژ سیاسەتا مژوولکرنێ یا دەولەتا تورکیا دلگرانە و دەم پارتی ژی نەشیایە یا پێدڤی بۆ پێشڤەبرنا قووناغا ئاشتیێ ئەنجام بدەت.
د. وەهاب جوشکون مامۆستایێ زانکۆیێ دیار کر، هەتا نها ژ ئالیێ دەولەتا تورکیا ڤە چو نەهاتیە کرن، هەردەم بەحسێ چارەسەرکرنا پرسا کوردی دهێتە کرن, لێ ب کریاری ژ بۆ چارەسەرکرنا پرسا کوردی ژ ئالیێ دەولەتا تورکیا ڤە چو نەهاتیە کرن، پێدڤی بوو هەتا نها پەرلەمانێ تورکیا یاسایێن پێدڤی دەرخینیت و زەمینەیەکا گونجای بۆ خەباتا سیاسی ژی خوەش بکەت، لێ تشتێ هەتا نها دیارە چو نەهاتیە کرن و سیاسەتا دەولەتێ زێدەتر وەکو مژوولکرنا کوردان و رایا گشتی دهێتە دیتن و گۆت: (راگرتنا شەڕی تشتەک باشە، پتر ژ سالەکێ یە شەڕ هاتیە راگرتن و ئەو یەک ب دلێ هەموو کوردان و تورکانە، لێ گەلێ کورد ل تورکیا چاڤەرێی هندەک پێنگاڤێن نوو نە، مخابن کارەک وەسا نەهاتیە کرن و کورد دلگرانن).
ناڤهاتی دیار کر، رەنگە بەرپرسێن تورکیا هزرا هندەک تشتێن دی ژی دکەن، چونکی رۆژهەلاتا ناڤین بەر ب گوهۆڕینێن گەلەک مەزن ڤە دچیت، مەترسیا شەڕەکێ مەزن د ناڤبەرا ئیرانێ ل گەل ئەمریکا و ئسرائیلێ دا هەیە، هەروەسا رەوشا سووریێ ژی یا ئالۆزە و دبیت تورکیا هزرا گەلەک تشتێن دی دکەت، لێ کورد ل تورکیا ژی چاڤەرێنە ب کریاری هندەک تشت بهێنە کرن، چونکی نابیت بابەتێ پرسا کوردی وەکو بابەتەک بۆ هەلبژارتنان یان ژی سیاسەتا رۆژێ بهێتە بکارئینان، کورد ڤێ یەکێ قەبوول ناکەن.
ل ئالیێ دی عایشەگۆل دۆغان پەیڤدارا دەم پارتی ژی بەری دو رۆژان دیار کر، مخابن تشتێ مە چاڤەرێ دکر نەهاتیە کرن، دەولەتا تورکیا هەتا نها ب کریاری چو نەکریە، یاسایێن پێدڤی نەهاتنە دەرخستن، قووناغا ئاشتیێ گەلەک سست برێڤە دچیت و ئەم نزانین کا ل پشت پەردەیان دا چ هەیە، کورد دلگرانن و وەکو دەم پارتی ئەم ژی ژ رەوشا نها دلگرانین و دڤێت بەرپرسێن دەولەتێ گوهداریا داخوازیێن کوردان بکەن و گرنگە وەکو نیەت پاکی ژی دەست ب هندەک گوهۆڕینان بهێتە کرن، مە بەری نها ژی دیار کریە دڤێت هندەک یاسا ل پەرلەمانی دەرکەڤن کو ببنە گەرەنتی بۆ بەردەوامیا قووناغا ئاشتیێ و چارەسەرکرنا پرسا کوردی.
ناڤهاتیێ ئەو یەک ژی دیار کر، پەکەکێ و ئالیێ کورد ل تورکیا گەلەک تشت ئەنجام داینە و چاڤەرێنە دەولەتا تورکیا ژی هندەک تشتان بکەت، لێ مخابن ژ ئالیێ دەولەتا تورکیا ڤە ب کریاری چو نەهاتیە کرن، وێ رۆژێ ژی بەرێز دەولەت باخچەلی دیار کر دڤێت لیژنەیێن پەرلەمانی ب کارێ خوە رابن و یا پێدڤی بکەن، چونکی گیرۆبوونا نها دێ کاریگەریا خوە یا گەلەک خراب بۆ تورکیا هەبیت، رەوش گەلەک هەستیارە و هەکە یا پێدڤی نەهێتە کرن دێ ئالۆزیێن نوو روو دەن و ئەو یەک د بەرژەوەندیا چو ئالیەکێ دا نینە.
حەسەن ئامەدی چالاکڤانێ کورد ل ئامەدێ ژی دیار کر، چو تشتەک نەهاتیە کرن، پەکەکێ خوە هلوەشاند و شەڕ هاتە راگرتن، لێ ل هەمبەر دا چو نەهاتیە کرن، دگۆتن دێ گەلەک قانوون دەرکەڤن دێ گەلەک تشتێن باش روو دەن، لێ هەتا نها ب کریاری چو نەهاتیە کرن، ب تایبەتی ژی مە دڤێت هەموو ئاستەنگێن ل هەمبەر زمانێ کوردی ل تورکیا نەمینن، لێ مخابن ئەو یەک نەهاتیە کرن، وەکو پێنگاڤا ئێکێ پێدڤی بوو هەموو قەیوومێن کو دەولەتا تورکیا ب جهێ سەرۆک باژێرڤانیێن کورد دانایی، وان راکەت و جارەکا دی سەرۆک باژێرڤانیێن کو ب دەنگێ کوردن هاتینە هەلبژارتن ڤەگەرنە ڤە سەر کارێن خوە، لێ مخابن هەتا نها ئەو یەک ژی نەهاتیە کرن، ئانکو کورد ل تورکیا مافدارن دەمێ بێژن دەولەتا تورکیا تنێ کوردان مژوول دکەت.
ناڤهاتی ئەو یەک ژی دیار کر، پرسا کوردی پرسەکا گەلەک مەزنە، بابەت تنێ سیاسەت و شەڕ نینە، بابەت مافێ پتر ژ بیست ملیۆن مللەتێ کوردە کو ب سالانە زۆرداری لێ دهێتە کرن، دڤێت دەولەتا تورکیا ب فەرمی هەبوونا گەلێ کورد قەبوول بکەت، دڤێت ل پەرلەمانێ تورکیا یاسایێن نوو دەرکەڤن و هەروەسا گەلەک یا گرنگە دستوورێ نها یێ تورکیا بهێتە گوهۆڕین و گەلەک مافێن کوردان د دستوورێ تورکیا دا بهێتە گەرەنتیکرن، هەتا ئەو یەک نەهێنە کرن بێگومان دێ کورد هەر دلگران بن.
ل ئالیێ دی گەلەک ژ چاڤدێرێن سیاسی یێن کورد ل تورکیا و ئۆرۆپا ژی دیار دکەن، یا نها دەولەتا تورکیا دکەت سیاسەتا مژوولکرنێ یە، مخابن هەتا نها دەولەتا تورکیا ب کریاری چو نەکریە، بابەتێ مافێن گەلێ کورد بابەتێ تیرۆرێ و شەڕی نینە، بابەت گەلەک مەزنە و هەتا کورد ل تورکیا نەگەهنە مافێن خوە دێ رەوشا نها یا ئالۆز بەردەوام بیت، ژ بەر ڤێ یەکێ ژی هەتا دەولەتا تورکیا ب فەرمی هەبوونا کوردان قەبوول نەکەت و د دستووری دا مافێن گەلێ کورد نەهێنە گەرەنتیکرن، کورد نەشێن باوەریا خوە ب دەولەتا تورکیا بینن.
