رەوشەنبیری و ژیان
ئاشتی سالح
ژیان ب هەموو رەنگ و دەنگێن خۆ ڤە، قوتابخانەیەكا مەزنە و هەر رۆژەكا دەرباز دبیت وانەیەكا نوو ددەتە مە، مرۆڤێ سەركەفتی د ڤێ ژیانێ دا ئەو نینە یێ خودان مال و سامانەكێ زۆر، بەلكو ئەو مرۆڤە یێ كو خودان هزرەكا رەوشەنبیر و دلەكێ ئاڤا بیت، د جڤاكێ مە یێ ئەڤرۆ دا، پاراستنا رەسەنیێ و كاركرن بۆ پێشڤەچوونێ دو تەوەرێن سەرەكی نە كو دڤێت ئەم هەموو گرنگیێ پێ بدەین.
هەر د كەڤن دا هاتیە گۆتن (هندی تو بخوینێ، دێ زێدەتر زانی) بەلێ خواندن بتنێ ب دەستڤەئینانا باوەرنامەیەكێ نینە، بەلكو تێگەهشتنە ژ دەوروبەران، گەنجێن مە پێدڤیە ببنە هەلگرێن مەشخەلا زانست و زانینێ بن، چنكو ئەم یێ ل سەردەمەكێ دژین كو جیهان یا بوویە گوندەكێ بچووك، لەوما پێدڤیە ئەم ل سەر هەموو بۆاران یێن شارەزا بین، چ د بۆارێ تەكنۆلۆژیایێ دا بیت یان ژی د بۆارێ مێژو و ئەدەبیاتا مە یا دەولەمەند دا. مرۆڤێ زانا چو جاران د تاریاتیێ دا نامینیت و دێ هەردەم رێكا راست بۆ خۆ و جڤاكێ خۆ بینیت.
رەوشت، بنیاتێ هەموو تشتانە، جڤاكەكێ بێ رەوشت، هەموو پێشكەفتنێن وێ دێ بێ مفا بن، پێدڤیە ئەم پارێزگاریێ ل وان داب و نەریتێن جوان بكەین كو باب و باپیرێن مە بۆ مە هێلاین. رێزگرتن ل مەزنان، هاریكاریكردنا هەژاران و هەبوونا روحەكا برایانە د ناڤبەرا مە دا، ئەو تشتن كو مە ژ گەلێن دی جودا دكەن. د هەمان دەم دا دڤێت ئەم یێن ڤەكری بین بەرامبەر گوهۆڕینێن باش و مفای ژ ئەزموونێن مللەتێن پێشكەفتی وەربگرین، بێی كو ئەم رەسەنیا خۆ و زمانێ خۆ یێ شرین ژ دەست بدەین.
چو سەركەفتن ب بێ زەحمەت ناهێنە دەست، ژیانێ پێدڤی ب بزاڤ و تێكۆشانێ هەیە، ئەو كەسێ ب دەست و زەندكێن خۆ كار دكەت، نانی وی یێ حەلالە و سەرێ وی د بلندە، كاركرن بتنێ بۆ بدەستڤەئینانا پارەی نینە، بەلكو بۆ هندێ یە كو مرۆڤ مفایەكێ بگەهینتە جڤاكێ خۆ، هەر ئێك ژ مە د جهێ خۆ دا دشێت ببیتە ئەگەرێ گوهۆڕینەكا مەزن، هەكە جۆتیار د زەڤیا خۆ دا ب دلسۆزی كار بكەت و مامۆستا د پولێ دا ب ئەمانەت وانەیێ بێژیت، و فەرمانبەر كارێ خەلكی ب درستی برێڤە ببەت، بێ گومان وەلاتێ مە دێ بەرەو لوتكەیا پێشكەفتنێ چیت
