ئەمجەد عەتوان: دڤێت یاریزان بەرپرسیارەتییا خوە وەربگریت
د دیدارەكێ دا ئەمجەد عەتوان ستێرا تیما یانەیا زاخۆ وەكهەڤییا تیما خوە بەرانبەر یانەیا نەفت ب ئاسایی دانا بەرانبەر دوورئێخستنا سێ یاریزانان ب كارتێن سۆر و هیڤی خواست یاریزان بۆ هەر یارییەكێ بەرپرسیارەتییا خوە دناڤا یاریگەهێ دا بزانن، ئەڤچەندە هات پشتی یارییا وان یا گەڕا بۆری بەرانبەر یانەیا نەفت ب گۆلەكێ وەكهەڤبووین، ئەوا دادڤانێ یاریێ هەرسێ یاریزانێن زاخۆ حەسەن ئەلرائید، ئەحمەد ئیبراهیم و غابی كیكی ب كارتێن سۆر دەرئێخستن.
زێدەتر ناڤهاتی گۆت: هەرچەندە مە یارییەكا باش دكر و پتر ئەم نێزیكی گۆلێ بووین سەرباری هەرسێ كارتێن سۆر بەرانبەر یاریزانێن مە، دڤیابا مە سێ خال ب دەستڤە ئینابان هەكەر یاریزانان كۆنترۆل ل سەر خوە كربا و شیابن تۆرەییا خوە ڕاگرن، دڤێت یاریزان دناڤا یاریگەهێ دا ب دروستی بەرپرسیارەتییا خوە وەربگرن و بزانن ئەو یێ یاریێ دكەن بۆ سەركەڤتنێ و هیچ لڤینەكا تیما بەرانبەر كارتیكرنێ ل سەر دەرۆنێ وی نەكەت.
ئەمجەد عەتوانی گۆت: مە سەركەڤتن ژ دەستدا و ئەم باشتر بووین، ئەڤ یارییە دڤێت بهێتە ژبیركرن و هزر د قەرەبوویێ بكەین د یارییا بهێت دا، لێبۆرینێ ژ پشتەڤانێن یانەیێ دخوازین و سۆزێ ددەین بۆ یاریێن بهێت ئاست و ئەنجام باشتربن، سەرباری هەڤڕكییەكا ب هێز بۆ ڕێزێن پێشیێ و دووركەڤتنا مە لێ ئەم ڕژدین زاخۆ بۆ هەر یارییەكێ یا هەڤڕكا سێ خالان بیت.
