وەزارەتا كـار: دانـا 150 ملیۆن دیناران بۆ پڕۆژەیان دێ دەست پێ كەتەڤە
زنار تۆڤی:
وەزارەتا كار و كاروبارێن جڤاكی یا حكومەتا هەرێما كوردستانێ راگەهاند، قووناغا دووێ یا پڕۆژەیێ پشتەڤانیا دارایی هەتا 150 ملیۆن دیناران بۆ كۆمپانیان دێ دەست پێ كەتەڤە.
ئاریان ئەحمەد، پەیڤدارێ وەزارەتا كار و كاروبارێن جڤاكی گۆت: «پارە ب هەڤكاری د ناڤبەرا رێكخراو و حكومەتێ دا بۆ پڕۆژەیان دێ هێتە دابینكرن، ئەڤ پڕۆژە د بەردەوامیا بزاڤێن وەزارەتا كار و كاروبارێن جڤاكی دایە بۆ پشتەڤانیكرنا پڕۆژەیێن بچووك و ناڤنجی ل هەرێمێ».
گۆت ژی: «ئەڤ پارە ب هەڤپشكی د ناڤبەرا كۆمپانی و حكومەتێ دا بۆ پڕۆژەیان دێ هێتە مەزاختن، حكومەتا هەرێما كوردستانێ دێ سەرپەرشتیا هەموو پرۆسەیێ كەت، ئەڤ هاریكارییە بۆ كەسێن تایبەت نینە، بەلكو ب تنێ بۆ كۆمپانیانە و ئارمانج ژێ، بەرفرەهكرنا كارێن كۆمپانیانە ل كوردستانێ».
ئاریان گۆت ژی: «ئەڤە قووناغا دووێ یا پڕۆژەیە، د قووناغا ئێكێ دا 25 پڕۆژەیێن جودا ل باژێڕێن جودا یێن هەرێما كوردستانێ مفا ژێ وەرگرتبوو، گوژمێ هاریكارییێ هەتا 150 ملیۆن دینارایە و ل دویڤ جۆرێ پڕۆژەیی دێ هێتە گوهۆڕین، هەروەسا د ڤێ قووناغێ دا تەكەزی ل سەر بهێزكرنا بنەمایێن ئابۆری یێن پڕۆژەیان و بەردەوامبوونا شیرەتكارێن تەكنیكی دهێتە كرن، ب ئارمانجا ڤەژاندنا كەرتێ تایبەت و پەیداكرنا دەلیڤەیێن كاری بۆ گەنجان ل كوردستانێ.»
