ئەو وەلاتیێن ژینگەهێ پیس دكەن دێ هێنە سزادان
رەمەزان زەكەریا:
پێخەمەت پاراستنا سیما و پاقژیا باژێڕی، پۆلیسێن دارستانێ ل ئاكرێ بڕیار دا سزایێن دارایی لسەر وان كەسان بهێنە سەپاندن یێن گلێشی ل جهێن نەگونجای دهاڤێژن.
عەقید سەعد خالد، رێڤەبەرێ پۆلیسێن دارستانا ئاكرێ بۆ ئەڤرۆ گۆت: «ل گۆرەی رێنومایێن پاراستنا ژینگەهێ، یاسا هەژمارە 1 یا سالا 2015 و ماددەیێ 1 هەر وەلاتیەكێ سەرپێچیەكا ژینگەهێ ئەنجام بدەت، مینا: پیسكرنا ژینگەهێ یان هاڤێتنا گلێشی، ب گوژمێ 10هزار دیناران كێمتر نەبیت و ژ 50 هزار دیناران زێدەتر نەبیت دێ هێتە سزادان».
گۆت ژی: «هاڤێتنا بەرمایكێن مالان ل سەر رێكێن گشتی، ب هەمی جۆران و هاڤێتنا هەر تشتەكی ژ دەرگەهـ و پەنجەرێن ترۆمبێلان ل سەر رێكان د دەمێ چوونێ یان راوەستانیێ دا و هاڤێتنا پارچە و چقێن داران ل كۆلان و گۆرەپانێن گشتی یان گەرەكێن ئاكنجیبوونێ قەدەغەیە».
