نڤیسەرەكێ هۆلەندی ڕۆمانەك ل سەر كارەساتا ئەنفالێ بەلاڤكر
رەمەزان زەكەریا
هونەرمەند (گۆران بابە عەلی) خودانێ ئەفسانە گەلەری، ددیدارەكێ دا بۆ رۆژنامەیا ئەڤرۆ گۆت: ڕۆمانا زیندووبووەكان (زیندی مای) بەرهەمەكێ ئەدەبی و مرۆڤیێ كوور یێ نڤیسەرێ هۆلەندی (یۆست هیڵتەرمانە) ل سەر كارەساتا ئەنفالێن كوردان هاتییە نڤیسین، ئەڤ ڕۆمانە ب بەلگەنامەیەكا هەستیارە ل سەر یادەوەری تاوان و مانا مرۆڤی د بن سیبەرا جینۆسایدا سالا ١٩٨٨ێ دا.
ناڤبری گۆت: نڤیسەری پشتی چەندین سالان ژ ڤەكۆلینا ل سەر ئیراق و كوردستانێ شیایە دیرۆكێ ژ ژمارە و بەلگەنامەیێن سار بگوهۆڕیت بۆ چیرۆكێن مرۆڤی د ڕۆمانێ دا خواندەڤان بەرامبەر كارەكتەرێن جودا دبینیت هندەك ژ وان قوربانیێن ڕاستەوخۆنە كو گوندێن وان هاتینە سۆتن و د كەمپێن كۆمكرنێ دا دەرباز بووینە و هندەكێن دی ژی شایەتحالن یان كەسێن د ناڤ سیستەمێ ستەمكار دا بووین و نوكە دگەل ویژدانێ خۆ دجەنگن.
ناڤهاتی گۆت: ڕۆمان ب هویری رۆناهی دئێخیتە سەر ژیانا وان كۆچبەرێن كورد یێن كو قەستا ئەمریكا و ولاتێن دی كرین ئەو نیشا ددەت كو ئەڤ كەسە د ناڤبەرا دو جیهانان دا دژین و برینێن وان د ناخ دا هەر د ساخن هەروەسا بەحس ل نڤشێ نوو دكەت كو ل هاندەران مەزن بووینە بەلێ هەر ل دووڤ ناسنامەیا خۆ و چارەنڤیسێ دایك و بابێن خۆ دگەڕیێن و نڤیسەر ب شێوازەكێ وێنەیی و پڕ ژ هەست بەحس ل ترس و بێدەنگی و برینێن جینۆسایدێ دكەت .