خواندەڤانا هزرێن من
مەتین وەرمێلی
سلاڤا وێ نە وەک هەر سلاڤەکێ بوو، ناڤێ من ل سەر لێڤێن وێ وەک زەنگەکا مەزن د مێشکێ من دا لێدا. بۆ چەند چرکەیان، ئەز بوومە ڕێبوارەکێ بەرزە د ناڤ جاددەیێن ئالۆزێن بیرهاتنێن خۆ دا. من هزر دکر ئەو بتنێ ئێک ژ وان بینەرانە یێن ل پشت شاشەیێن سار نڤێسینێن من دخوینن، بەلێ من نەدزانی ئەڤ کچە ل سەر لاپەڕێن دلێ من یا نڤستییە و هەمی دەمارێن مێشکێ من یێن خواندین و ڤەخواندین.
دیتنا وێ وەک برۆسکەکێ بوو، د ناڤ چاڤێن من دا چوو خوار و ل ناڤ لەزاتییا لێدانێن دلێ من دا ئاكنجی بوو. مێشکێ من، وەک برسییەکێ معریفەتێ، دڤیا ژ تبلێن پێ یێن وێ تا کلۆڤاندکا سەرێ وێ وەک هەلبەستەكا درێژ ڤەخوینیت، بەلێ شەرمێ دیوارەکێ بلند د ناڤبەرا مە دا ئاڤا کربوو.
پشتی ئەم بووینە هەڤال، ب ڕاستی وەک ڕۆژێ بۆ من ڕۆهن بوو، هەر چەندە ئەز بۆ وێ نە هەڤالەکێ نوی بووم. و ژ مێژە بوو ئەو دگەل هزر و بیرێن من دژیا، وەک بێژی وێ ناسنامەیا من ژ ناڤ دێڕێن نڤیسینێن من دەرئێخستبوو. ئەو گەلەک یا جوان بوو، بەلێ بەس نەبوو دا مێشکێ من داگیر بکەت، بەلکو تێگەهشتن و ڕەوشەنبیرییا وێ بوون ئەوێن ڕۆژ ب ڕۆژێ هەستێن من د لواندن و ئەز بەرەڤ سنوورێن عەشقەکێ دبرم کو چ ڕێک بۆ ڤەگەڕیانێ تێدا نەیی.
د وێ بێدەنگییا کویر دا، من دڤیا هەر وەک خەونەکێ، چاڤێن من د ناڤ چاڤێن وێ دا بن و چ جاران دەرنەکەڤن. من خەون پێڤە ددیتن، و دەستێن من د ناڤ وێ پرچا زەر دا بەرزە دبوون، وەک بێژی ئەز یێ ب ئاڤرمیشەكێ زێڕین یاریان دکەم. ل وێ گاڤێ، من دڤیا بتنێ بێدەنگ ببم و گوهداریا وان پەیڤان بکەم یێن ژ ناڤ لێڤێن وێ یێن سۆر دەردکەڤن؛ چونکی هەر پەیڤەکا وێ بۆ برینێن من وەک دەرمانەکێ کوردی بوو. غەریبییا وێ بێدەنگییەکا گران ل سەر دلێ من بجهـ هێلابوو، بەلێ د ناڤ وێ بێدەنگییێ دا، مێشکێ من قیامەت ل هەستێن من ڕاکربوو.
ئێدی دناڤبەرا مە دا زمانەکێ دی پەیدا ببوو کو پێدڤی ب چ پەیڤان نەبوو. دەما وێ بەرێ خۆ ددا من، من هەست دکر مێشکێ من وەک پەرتووکەکێ ل بەر دەستێن وێ یێ ڤەکرییە؛ وێ هەر هزرەکا من دکر دزانی، بەری ئەز بکەمە پەیڤ. هەر جارا ئەو نێزیک دبوو، من هەست دکر قیامەتەکا دی د ناڤ دەمارێن من دا ڕادبیت، نە ژ ترسێ، بەلکو ژ وێ معریفەیا وێ د چاڤێن خۆ دا هەلگرتی. ئەڤە بتنێ حەژێکرن نەبوو، بەلکو جۆرەکێ وەغەران بوو بۆ ناڤ جیهانەکا کو مرۆڤ تێدا خۆ دبینیتەڤە.
جاران من ئاگەهـ ژێ هەبوو، دەما ڕوحا من ئەز د ناڤ قولاچێن هزرێن وێ دا دهێلام و بەرەڤ دیوانا وێ دچوو. من دزانی ڕوحا من ئێدی نە یا منە، بەلکو یا ل دەف وێ یە. تشتێ سەیر ئەو بوو، من هەست پێ دکر دەما ڕوحا وێ، ڕوحا من هەمبێز دکر؛ چونکی گەرماتییا وێ هەمبێزێ دگەل ڕوحا من دزڤڕی ناڤ لەشێ من یێ سار. وێ گاڤێ، ئەز و عەشق و دل پێکڤە گەرم دبووین و من هەست دکر ژیان دیسا د ناڤ دەمارێن من دا دەست ب ڕێڤەچوونێ دکەت.
سەرەڕای ڤێ هەمی گەرماتییێ، ترسەکا شرین د دلێ من دا هەبوو؛ ترسا ژ وێ کو ئەز ژ ڤێ خەونا جوان هشیار ببم. من هەست کر بێهنا وێ وەک بێهنا لاپەڕێن پەرتووکەکا پیرۆزە و هەر جهێ ئەز بچمێ، ئەو بێهن دگەل منە. نوکە ئەز تێگەهشتم کو عەشق نە پەیڤن مرۆڤ د بێژیت، بەلکو جیهانەکە مرۆڤ تێدا بەرزە دبیت. ئەز و ئەو بووینە ئێک چیڕۆک، کو دەستپێکا وێ یا دیارە، بەلێ دووماهییا وێ دێ دناڤ لاپەڕێن پەرتووکا بیرهاتنان دا دهێتە نڤیسین.