ل ڕۆژا جیهانی یا كرێكاران
رەحیما بەرواری
ڕۆژا ئێكی ئەیارێ هەمی سالان، جەژنا وان كەسانە یێن كو ل گەل سپێدەهیا زوو و ل دەمێ ڕۆژهەلاتنێ ژ مالێن خۆ دەردكەڤن و هەتا ڕۆژئاڤا كارەكێ حەلال دكەن. ئەوێن ل سەر پێیێن خۆ ڕادوەستن ب وێ هیڤییا كو نانەكێ حەلال بۆ زارۆكێن خۆ ببەنە مال. ئەم ڤێ ڕۆژێ ل هەمی جیهانێ و ب تایبەت ل كوردستانێ پیرۆز دكەین. هەر وەك پێشینێن مە گۆتی: “شۆلكەرێ خۆ بە، خۆشتڤیێ خەلكی بە”.
كرێكار ئەو مرۆڤێن خۆدێنە یێن كو ب ڕەنج و زەحمەتا خۆ ئەڤ وەلاتە ئاڤاكری و هێشتا ژی ل سەر كارێن خۆ یێن گران و ب زەحمەت دبەردەوامن. ئەگەر ئەم باش هزرا خۆ بكەین و بەرێ خۆ بدەینە دەوروبەرێن خۆ، دێ بینین هەر ئاڤاهیەكێ هاتیە ئاڤاكرن، هەر كەلهەكا هاتیە بلندكرن، هەر جاددەیەكا هاتیە قێركرن و هەر خانیەكێ ئەم تێدا دژین؛ ئەڤە هەمی بەرهەمێ دەستێن وان كەسانە یێن كو چ جاران نابێژن ئەم یێن وەستیایین. ل بەر گەرماتیا هاڤینێ چ جاران دەست ژ كارێ خۆ بەرنەداینە و پاشڤە نەچووینە، د هەر وەرزەكێ سالێ دا بن، ئەو هەر د مژوولی كارێ خۆ یێ پیرۆزن.
هەروەسا د سەرمایا زڤستانێ دا، ئەو هەر ل مەیدانێنە و خزمەتا گەلێ خۆ دكەن. ل ڤێ ڕۆژا پیرۆز ئەركێ مە هەمیانە كو بتنێ ب پەیڤ و گۆتنێن خۆش بەحسێ وان بكەین، بەلكو پێدڤیە ئەم جەژنا وان پیرۆز بكەین و خەلاتان پێشكێشی وان بكەین. دیسا دڤێت د ناخێ خۆ دا ڕێزەكا مەزن و ژهەژی ل ماندیبوونا وان بگرین.
دڤێت ئەم د چاڤێن وان دا ببینین كو ئەون یێن ژیانێ ب ڕەنگێن جوان دخەملینن؛ چونكو ئەگەر كرێكار نەبن، نە پیشەسازی دێ هەبیت و نە ژی گەشەپێدان دێ پەیدا بیت، ب كورتی ژیان دێ ڕاوەستیت. جاددە و كۆلانێن مە شاهدیێ ل سەر خەمخۆری و بێهنفرەهیا كرێكارێن مە دكەن، یێن كو ب كێمترین كەرەستە و ب مەزنترین ئیرادە كار دكەن.
دڤێت هەردەم پشتەڤان بین دا كو مافێن وان نەهێنە خوارن، دا كو ب دلەكێ ئارام بچنە سەر كارێن خۆ و ب دلەكێ گەش ڤەگەڕنە ناڤ خێزانێن خۆ. پێدڤیە هەمی بەرپرس و خودان كار بزانن كو خوهدانا كرێكاری بەری هشك ببیت، دڤێت كرێیا وی ب تەمامی بدەنێ؛ چونكو ئەڤە فەرمانا ئایینێ مە و ڕەوشتێ مە یێ كوردی یە. هەر دلۆپەكا خوهێ كو ژ ئەنیا كرێكارەكی دباریت، هیڤیەكا مەزن دروست دكەت كو وەلاتێ مە پێ دهێتە خەملاندن.
ئەگەر ئەم بەحسێ ژیانا وان بكەین، دێ بینین چیرۆكێن وان تژی نە ژ سەبر، دلۆڤانی و قوربانیدانێ. ئەو قەهرەمانێن ڕاستەقینە یێن جڤاكا مەنە، چونكو چ جاران گازندەیێ ژ كارێن خۆ یێن سەخت ناكەن و هەر ب كەیف و خۆشی كاردكەن. یا فەرە بێژینێ: هوین بنیات و ستوونا ئاڤەدانیێ و پێشخستنا ملەتێ مەنە، هوین شانازییا مە نە و بێ هەوە ئەم ناگەهینە چ ئارمانجان. دڤێت قانوونێن كاری ل وەلاتێ مە هێشتا ب هێزتر لێ بهێن دا كو كرێكار هەست بكەت پاشەرۆژا وی و یا زارۆیێن وی یا پاراستییە. ب ئێمناهی بژیت و بزانیت كو ل دەمێ نەخۆشیێ یان پەككەفتنێ، جڤاك پشتێ نادەتێ و خۆ لێ دكەتە خودان؛ ئەڤە كێمترین مافێ وان یێ مرۆڤی یە.