پڕۆژەیەكێ ستراتیژی یێ ئاڤێ ل ناوچەداریا خانكـێ دێ كەڤیتە د خزمەتا وەلاتیان دا
دهۆك، لەزگین جۆقی:
رێڤەبەرێ ناوچەداریا خانكێ یا سەر ب دەڤەرداریا سێمێلێ ڤە دیار كر، حكومەتا هەرێما كوردستانێ ئاریشەیا ئاڤا ڤەخوارنێ ب تەمامێ ل خانكێ چارەسەركر و دبێژیت: ل نێزیك مەزنترین پڕۆژەیێ ئاڤا خانكێ دێ هێتە ڤەكرن.
زەردەشت شێخ شامۆ، رێڤەبەرێ ناوچەداریا خانكێ بۆ ئەڤرۆ گۆت: «حكومەتا هەرێما كوردستانێ ب گوژمێ سی ملیار و500 ملیون دیناران پڕۆژەكێ مەزن یێ ئاڤا ڤەخوارنێ ل ناوچەداریا خانكێ چێكریە، پڕۆژە ب رێژەیا 95٪ هاتیە بجهینان و ل نێزیك دێ تمام بیت و كەڤیتە د خزمەتا وەلاتیان دا، د قووناغا ئێكی دا، ئاڤ دێ گەهیتە ناوچەداریا خانكێ، د دووڤ دا پڕۆژە دێ هێتە بەرفرەهكرن و دێ ئاڤ گەهیتە دەڤەرداریا سێمێلێ و كۆمەلگەها تەناهیێ و چەندین جهێن دی دێ مفای ژێ بینن، ئاریشەیا ئاڤا ڤەخوارنێ ل دەڤەرداریا سێمێلێ ب تەمامێ دێ چارەسەربیت و خەلكێ ناوچەداریا خانكێ ژی ژ ئاریشەیا كیمبوونا ئاڤێ دێ قورتال بیت».
