فەستیڤالا ئێكـێ یا سپیاتیـان ل سێمێلێ دێ هێتە گێڕان
زاخۆ، دلۆڤان هالۆ:
لیژنا بلند یا فەستیڤالا ئێكێ یا سپیاتیان ل دەڤەرداریا سێمێلێ دیاركر كو ل دەمەكێ نێزیك فەستیڤالا ئێكێ یا سپیاتیان ل دەڤەرداریا سێمێلێ دێ هێتە گێڕان، ژ بۆ ڤێ مەرەمێ ب ئامادەبوونا دژوار شەوكەت، دەڤەردارێ سێمێلێ كۆمبوونەك ل كۆچكا دەڤەرداریا سێمێلێ هاتە كرن، تێدا بڕیار هاتەدان ب پشكداریا كۆمپانیێن پەیوەندیدار ب بەرهەمێ سپیاتیان ژ هەر چار پارچەیێن كوردستانێ ئەڤ فەستیڤالە بهێتە گێڕان.
لیژنا بلند یا فەستیڤالێ خویا كر، ئارمانج ژ ڤێ فەستیڤالێ پشتەڤانیە ل بەرهەمێن خۆمالی، نیشادانا هەموو بەرهەمێن سپیاتیانە و چێكرنا وانە د ناڤ فەستیڤالێ دا ب پشكداریا خودان بەرهەمان ژ هەر چار پارچەیێن كوردستانێ، د ڤێ فەستیڤالێ دا قووناغێن چێكرنا هەموو جۆرێن سپییاتیان ب شێوەیەكێ ڕاستەوخۆ دێ هێنە نیشادان و ئەڤ فەستیڤالە دەرفەتەكا زێڕینە بۆ جۆتیار و خودانێن تەرش و كەوالی یێن دەڤەرێ، كو بەرهەمێن خوە نیشا خەلكێ بدەن.
لیژنێ ئەو چەندە ژی ئاشكرا كر كو چەندین بڕگەیێن هونەری ب پشكداریا هونەرمەندێن ناڤدار ژ باكوور و ڕۆژئاڤایێ كوردستانێ دێ هێنە پێشكێشكرن.
