بیرهاتنێن زارۆكینیێ چاوا كارتێكرنێ ل سەر بریاڕێن مە یێن ئەڤرۆ دكەن؟
حەمرا نشدار یاسین
زارۆكینی د ناخێ مە دا گەلەك بیرهاتنان دچینیت، ئەو بیرهاتنە ب درێژاهیا ژیانێ ل گەل مە دا دمینن، هەر سەربۆرەكا بچویك د زارۆكینیێ دا بەشەكێ مە یێ ئەڤرۆ د خۆیەتیا مەدا پێكدئینیت، هەر ترسەك هەر ئێشانەك هەر كەیفەك یا مە د زارۆكینیێ دا بۆراندی بەشەكێ مەزن ژ بریارێن مە یێن ئەڤرۆ پێكدئینیت، جاران دێ كارەكی هلبژێرین ل سەر وێ چەندێ كو دەوروبەرێن مە پێ ئارام ببن، نەك ژبەر هندێ كو مە ئەو كارە دڤێت، گەلەك جاران مەیلا مە پتر بۆ وان كەسان دچیت یێن هەستەكا زارۆكینیێ ل دەڤ مە پەیدا دكەن، ڤێجا چ ئەو هەستێ پاراستنێ بیت؛ یان یێ ژ دەستدانێ كارتێكرنێ ل مە دكەت بێی هوشیاریا مە، گەلەك بریاران ئەم ددەین ژبەر هەبوونا ترسەكێ د ناخێ مە دا، ل دەمێ ئەم زارۆك وەل مە دكەت ئەم ژ گەلەك تشتان برەڤین، گەلەك بریاران دێ دەین؛ چونكی ئەم نەشێین روی ب روی راستیان ببین، یانژی دێ دەستان ژ ئارامیا خۆ یا دەروونی بەردەین؛ داكو بەس كەسێن دی د ئارام بن، پتریا مە نزانن كا بۆچی ئەڤ رێكە هلبژارتە یانژی بۆچی وەدكەت ئەگەر چیە، بەلێ ئەو هەستێن زارۆكینیێ بەردەوام د ناخێ مەدا كاردكەن، دەمێ روی ب روی ژیانێ دبین ئەو هەستێن كەڤن دەر دكەڤنە ڤە، ترسا مە ژ دەستدانێ ل وی دەمێ ئەم د بچویك ئەو هەستە د پەیوەندیێن مە یێن نوكە دا دەردكەڤیت، ئەم پێكۆلێ دكەین كۆنترۆلێ ل سەر هەمی تشتان بكەین داكو هەست ب ئارامیێ بكەین، یانژی ژ گەلەك تشتان درەڤین دترسین سەركەڤتنێ تێدا نەئینن، یانژی بێدەنگیێ بهەلبژێرین هەكەر خۆ هەست ب ئێشانێ ژی بكەین، هندەك جاران ئەم رابردۆی دوبارە ئاڤا دكەینە ڤە ل شوینا چاڤێ مە ل نوكە بیت و ئاڤا بكەین، ئەم دشێن وان هەستێن د ناخێ مە دا بووینە قانوون و كاریگەریێ دكەنە سەر بریارێن مە بگوهۆرین ب رێكا سەرەدەریێ ل گەل وان هەستێن ترسێ یێن زارۆكینیێ دا تووش بووینێ، ئەم وان بیرهاتنان ژبۆ خۆ بكەینە رێنیشادەر؛ نەكو وان بكەینە زیندانا خۆیا هەردەم، بۆچی ل دەمێ مە تشتەك نەڤێت ژی ئەم هەر دبێژین بلا و د ناخێ مەدا بریار ب نەخێرە؟ بۆچی ئەم دویربوونێ یانژی بێدەنگیێ دهلبژێرین ل جهێ ئەم دەربرینیێ ژخۆ بكەین؟ بۆچی ئەم د رازی دبین ئەم بئێشین بەس دا یێن دی كەیڤخۆش ببن؟ ئەگەر هەمی دزڤریتەڤە ژبۆ وان ترس و هەستێن مە د زارۆكینیا خۆدا دیتین، بەلێ چارە چیە؟ نڤیسینا بەردەوام هاریكاریێ دكەت ئەوان هەستێن مە ل گەل خۆ هلگرتین هەتا رادەیەكێ باش ژ ناخێ مە دەربكەڤن، هەروەسا كویر هزری ل جهێن بێدەنگ بڕینینە خار و گوهێ خۆ باش بدەینە ناخێ خۆ ژ چ هەستان نەرەڤین، هزر بكە جاران كو تو ئەو زارۆكێ بچویك یێ بەری چەندین سالان پێكۆلێ بكە ل گەل خۆ باخڤە و بەحس ژ وان تشتان بكە ژبۆ خۆ یێن تە د زارۆكینا خۆ دا حەز ژێ دكر، دێ فێربی گوهێ خۆ بدەیە خۆ بێی كو بریارێ ل سەر ترسا خۆ بدەی، بڕیارێن دروست ژ نوكەیا تە دهێنەدان نە ژ رابردۆی؛ چونكی هەمی تشت بەردەوام یێ د گوهۆرینێ دا حەتا تو ژی ئەو كەسێ دوهی نینی، هەردەمێ مرۆڤ ل خۆ بگەهیت دێ خۆ ئازاد كەت ژ گەلەك قەید و زنجیرێن رابردۆی، هەر پێنگاڤەكا ئەم بەر ب تێگەشتنێ ڤە دهاڤێتن هەستێ هێزێ ل دەڤ مە پەیدا دبیت و بۆمە دیار دبیت كو ئەم نەئێخسیرێن رابردویێ خۆینە، یا چوو نازڤریتە و نەشێت بگوهۆرین، بەلێ یا دهێت بریار یا د دەستێ مە دا كا دێ چاوا ژین.
