ب نوونەراتیا هەرێما كوردستانێ شاندەكێ قەرەچان دێ چیتە وەلاتێ فرەنسا
شاكر ئەتروشی
سەرۆكێ رێكخراوا (سەراد) یۆ پاراستنا مافێن قەرەچان ل كوردستانێ، دیاركر كو رێكخراوا وان هاتیە داخوازكرن دا پشكداریێ د فەستیڤالەكا (دۆمان) قەرەچان دا بكەن، كو ل هەیڤا (10) ئەڤ سالە دێ ل باژێرێ (پاریس) پایتەختێ وەلاتێ فرەنسا هێتە گێڕان و دەمێ فەستیڤالێ (10) رۆژن و نوونەرێن (48) وەلاتان دێ تێدا پشكداربن و رێكخراوا ناڤبری دێ ب نوونەراتیا هەرێما كوردستانێ پشكداریێ دوێ فەستیڤالێ دا كەت و بەرنامەیەكێ باش بۆ وان رۆژان بەرهەڤكریە.
هونەرمەند (عابد دهۆكی) سەرۆكێ رێكخراوا (سەراد) یۆ پاراستنا مافێن قەرەچان ل كوردستانێ، ل دۆر وێ فەستیڤالێ بۆ رۆژنامەیا ئەڤرۆ گۆت: شاندێ مە یێ دهۆكێ ژ (8) كەسان پێك دهێت، مە ل بەرە ل رۆژا 8/10/ 2026 بەر ب وەلاتێ فرەنسا ڤە بچین بۆ پشكداریێ دوێ فەستیڤالێ دا و ل پێش وەخت مە بەرنامەیەك دانایە، كو پێك دهێت ژ چەند بڕگەیێن هونەری و نیشادانا كورتە فلمەكێ دكیۆمەنتی ل دۆر ژین و ژیارا (دۆمان/قەرەچان) ل كوردستانێ و ئەم دخۆشحالین كو تاكە رێكخراو ژ كوردستانێ هاتینە داخوازكرن بۆ وێ فەستیڤالێ، لەورا ئەم دێ ب نوورایەتیا هەرێما كوردستانێ د پشكداربین و سوپاسیا حكومەتا هەرێما كوردستانێ، ب تایبەت ژی بەرێز(د.عەلی تەتەر) پارێزگەرێ دهۆكێ دكەین كو هەموو جۆرە ئاسانكاری و رێخۆشكرن بۆ مە دابینكرینە بۆ پشكداریا مە دوێ فەستیڤالێ دا و ئەڤە نیشانا وێ چەندێ یە كو حكومەتا هەرێما كوردستانێ ب ئێك چاڤ و بێی فەرق و جوداهی سەرەدەریێ ل گەل هەموو ئۆل و ئاین و نەتەوەیان دكەت ل كوردستانێ.
