خوزیکا تو هوسا نە چووبای

عەدنان ئەحمەد مزووری

تو چووی،
ل وێ شەڤا،
ب قەلەڕەشکان دەسپێکری،
و دویماهی ب چەکچەکویلەیان
تو چووی،
و تە خەم هێلا،
وەکی وی کەڤری مە هەلگرت،
چەند دبەینە سەری؛
گڕێل دبیت..
تو چووی، وەک بای
و تە گونەهەک
د گەل خۆ بر،
تەمەت وێ خەما
ژمە ڕا مای..
چوونا پڕ ئێش،
شکەستنەک بوو،
ڕەڤینەک بوو،
یا بەرەف پێش..!

تو چووی،
و یا نەخۆشتر،
بارەکێ نهێنییا ل ئەردی ما،
ل شەڤەکا دەرڤەی چاخی،
ل تارییا
تو ڤەشارتی،
ژ ئەلندەکا هۆڤانە،
تو چووی،
و کەس پشتی کەسێ نا مریت
لێ ئەم کوشتین،
یا تە هێلای..
ئاگرەکە نا ڤەمریێت،
کەسەرە،
تەمەتی چیایی..
ئێک هۆسا دچیت؟!
چووی،
و تە قەبارەیێ وێرانبوونێ نەدیت،
تە، خۆشتڤی،
ب پرسیارا ڤه هەلاویستن،
وەک دو بەرخێن بتنێ،
ئو گورگ، سەد و بیستن..

خوزکا تۆ هۆسا نە چووبای..
دەم ڕاوەستا،
لسەر وێنەیێ
د ناخی دا چاپ بوویی ومای..
× کەڤرێ سیزیف: وەک هاتی د ئەفسانەیا گریگی دا.

کۆمێنتا تە