شنگال ب مەلبەندێ رەسەناتی و پاراستنا سترانێنن فولكلۆری دهێتە نیاسین
دلڤین رەشید
سترانبێژ (خەلەف خدر پاچو) دیدارەكێ بۆ رۆژنامەیا ئەڤرۆ دیاركر كو ئەو خەلكێ دەڤەرا شنگالێ یە، ژ بنەمالەكا هونەرمەندە و چەندین ستران و كلیپ هەنە ، ب تایبەت سترانێنن فولكلۆری یێن دەڤەرا شنگالێ.
ناڤهاتی گۆت: دمێژوویا هونەرێ كوردی ب گشتی و دەڤەرا شنگالێ ب تایبەتی ب مەلبەندێ رەسەناتی و پاراستنا سترانێنن فولكلۆری دهێتە نیاسین، هەر هوسا شنگال قوتابخانەكە سەربەخۆ ژ بۆ هونەرێ دەنگ بێژین دەڤەرێ، كو تێدا نڤشێ نوو فێری گۆتنا ستران و مۆزیكا فوكلۆرێ رەسەن یێ دەڤەرا شنگالێ ببن و راستە ب درێژاهیا دیرۆكێ ئەم وەك مللەتێ ئێزدی تووشی فەرمان و جینۆسایدا بوون، ل سەردەستی دوژمنان وان هەر دەم دڤان قوناغان دا بزاڤ دكرن ئەڤێ ئولا رەسەن ب كلتۆر و هونەر و ئەدەبیاتا وێ ڤە ژناڤ ببەت، بەلێ ئەم وەك گەنجێن شنگالێ چ جاران ناهێلین خەونا دوژمنان بجه بهێت و دێ بەردەوام ڤی كلتۆری پارێزین.
