خۆشحالم ب هەر پشكداریەكا من د بەرهەمەكێ هونەری دا كری
سندس سالح سلێڤانەیی
ئەكتەرا بەرنیاس (ئالا عەبدولرەحان) كو ژ ئیدارەیا سەربەخۆیا زاخۆیە، د دیدارەكێ دا بۆ رۆژنامەیا ئەڤرۆ گۆت: ئەز گەلەكا بچووك بووم دەمێ من حەزژ كارێ هونەری دكر و گەلەك جاران دا چمە دژۆرەكێ ڤە زارڤەكرنا ئەكتەران كەم و ئەڤ حەزە ل گەل من مەزن بووم هەتا من شوو ب هونەرمەند(مەهدی مونیر) كری، كو ئەو ژی ئەكتەر و دەرهێنەرەكێ بەرنیاسێ زاخۆ یە پتر دەلیڤە بۆ من چێبوو كو ب دروستی دەستپێبكەم، هەلبەت رۆلێ مالباتا خۆ ژی ب تایبەت دایك و بابێ خۆ ژبیرناكەم كو ئەو هەموو ل گەل هەڤژینێ من بوونە هاندەرو مە دەستپێكر و نوكە خۆشحالم ب هەر پشكداریەكا من دبەرهەمەكێ هونەری دا كری و دێ یا بەردەوامبم.
ناڤهاتی، كو ب (دەیكا محەمەد) ی، دهێتە نیاسین، هێشتا گۆت: من ل گەل هەڤژینێ خۆ پشكداری د هژمارەكا فلم و درامایان دا كریە، ژوانا درامایا (خۆدیك) كو ئەڤە چەند سالن د هەیڤا رەمەزانێ دا دهێتە نیشادان و گەلەك خەلك پێڤە هاتیە گرێدان، هەروەسا ل گەل خالێ خۆ ژی پشكداری دو شانۆگەریان بوویمە و ژبلی من و هەڤژینێ من زارۆكێن من ژی وەك ئەكتەر پشكداری د چەند بەرهەمێن هونەری دا كریە و دێ د بەردەوامبین.
