بـابێن سـەردەم
عاسیمە فـەخـری
د دیرۆك و كەتوارێ كوردی دا و هندی من دیتی و بهیستی بابێن مە و یێن پێش وان ژی هەستا دلۆڤانیێ و هەستا حەزژێكرنێ بۆ زارۆكێن خوە دیار نەدكرن نە ب گۆتنا پەیڤێن خۆش و دلڤەكەر و نە ب هەمبێزەكا گەرم. ئەز نابێژم ئەوان زاڕۆكێن خوە نەڤیاینە، ڕەنگە شەڕمكربیت ئەوان هەستان بۆ زاڕۆكێن خوە دەربێخیت یان ژی هند شاڕەزایی نەبیت كو ب چ ڕێیان ئەوان هەستان دەرببریت، یان ژی د ناڤ خێزانەكێ دا مەزن نەبوویە كو بزانیت ب دروستی و ب چ شێواز هەستێن خوە ڕاستە ڕاست دیاربكەت، یان ژی هۆسا ژ باب و باپیرێن خوە دیتیە و هزركریە هەما ئەڤەیە ئەوا دروست و هۆسا ژیان بەردەوامكریە. هەلبەت ئەز ئەڤێ چەندێ ل سەر هەموو بابان د هەردو سەردەمان دا گشتگیر ناكەم، بەلكو بابەت ڕێژەییە. چاوانییا ڕەفتاركرنێ و سەرەدەریكرنێ ل گەل زاڕۆیان ئەو ب تەمامی ل سەر ڕەوشەنبیرییا بابی دمینیت، ئەرێ ئاستێ تێگەهشتن و ڕەوشەنبیریا ئەوی بابی ل چو ئاستە؟ ب بۆچوونا من ژلایەكی ڤە زاڕۆكێن سەردەم و یێن نوو دهێنە د ژیانێ دا ب شانسن، بۆچی دبێژم ب شانسن؟ چونكی د كەڤن دا ب ڕێژە ئەو زاڕۆكە د كێم بوون یێن د ناڤ كەشەكێ خێزانی یێ پڕی دلۆڤانی، حەزژێكرن، تێگەهشتن، ئارامی…دا دژیان، بابێن بەرێ ڕەنگە ددەما ئامادەبوونا وی دا زاڕۆكێن وی نەوێریا بان ژ جهێ خوە ڕاببان یان ژی ب دروستی سەحنەكربانە ناڤچاڤێن بابێ خوە و ل دیوانا وی شەڕمكربیت سەرێ خوە بلندبكەت و دگەل بپەیڤیت.
بەلێ بابێن نوكە ئارامتر، دلۆڤانتر و زێدەتر حەزژێكرن و گرنگییێ ددەنە زاڕۆكێن خوە ب شێوەیەكێ ڕاستەوخوە هەموو هەستێن خوە یێن ئەرێنی ژ دلۆڤانیێ و حەزژێكرنێ و گرنگیدانێ… بۆ دەردبرن، بێگومان هەموو بابێن سەردەم ژی ب ئەڤی ڕەنگی نینن، بەلێ دبینم و د بهیسم ب ڕێژە جوداهییەكا مەزن هەیە پێش سەردەمێ بەرێ ڤە.
ئەرێ پا فاكتەر چنە بابێن سەردەم ئارامتر و دلۆڤانتر و زێدەتر گرنگیێ ب زاڕۆكێن خوە ددەن ژ بابێن سەردەمێ بەرێ؟ ئەگەر بابەت كاركرن بیت كو بابێن بەرێ هند دەم نەبوویە زاڕۆكێن خوە ببینن و ڤیانا خوە بۆ دیاربكەن، بابێن نوكە ژی كاردكەن و ب دیتنا من كار ل ئەڤی سەردەمی بزەحمەتترە و نانێ ژیانێ دەمژمێرێن درێژێن كاركرنێ بۆ دڤێن، هەروەسا كارتێكرنا ئەو كەشێ خێزانی یێ مرۆڤ تێدا مەزنبووی كاریگەرییەكا مەزن ل سەر دەروونێ مرۆڤی دكەت ب ڕێژەیەكا مەزن هەتا پشتی مرۆڤ هەڤژینیێ پێكدئینیت ژی كچ هەمان ڕەفتارێن دایكا خوە و كوڕ هەمان ڕەفتارێن بابێ خوە دوبارەدكەت، ل دەمەكی ئەوان ڕەفتاران دوبارە ناكەت؛ ئەگەر هزر بكەت ئەرێ ئەو ئاخفتن و ڕەفتارە د دروستبوون یان نە؛ ئەگەر د شاشبن ل یێن دروست بگەریێت.
ل دویماهیێ بابێن تێگەهشتی و ڕەوشەنبیر یێن بهایێ خێزانا خوە دزانن و ب ڕێیێن دروست و ساخلەم سەرەدەریێ ل گەل هەر تاكەكێ وێ دكەن د كەڤن دا هەبووینە و د نۆكە دا ژی هەنە ئەڤا من گۆتی ڕێژەیی یە بەلێ دبینم ڕێژا پتر بابێن نوكە دلۆڤانتر و ئارامترن دشێن ب ڕەنگەكێ ئێكسەر و جوان هەستێن خوە بۆ زارۆكێن خوە دەرببرن بۆ دیاربكەن كا چەند حەز ژ وان دكەن و چەند بۆ وان د گرنگن، بزاڤێ دكەن زێدەتر دەمێ خوە دگەل ببۆرینن و چەندین جۆرێن یاریان دگەل دكەن.
ڕەنگە ژی كاكلكا بابەتی ئەو بیت كو بابێن نوكە د زاڕۆكینیا خوە دا و هەتا پشتی ژیانا هەڤژینیێ پێكئینایی ژی هێشتا هەست ب وێ ڤالاهیێ د ناڤ خوەیا خوە دا دكەت، یێن بۆ زارۆكێن خوە دبنە ئەو بابە یێن وان ل زاڕۆكینیا خوە دڤییا وان بابەك وەسا هەبا و دەما كو زاڕۆكێن وان مەزن دبن شانازیێ ب بابێ خوە ببەن و هەست ب وێ ڤالاتیێ نەكەن یا ئەوان هەست پێ كری، هەر تشتێ د شیانێن وی دا هەبیت ژ دابینكرنا پێدڤییێن خوارنێ و هەتا جلكان و یا هیشتا گرنگتر كەیفخوەشییا دل و دەروونێ زاڕۆكێن وی یە هەر تشتێ د شیانێن وی دا هەیی پشێكێش دكەت.
