هەوەكـا نشتیمانی بۆ كێمكرنا دیاردەیا سـەیێن بەردایی
حـاجـی بێسكی
ئەڤە مەترسییەكا بێدەنگە هەڕەشێ ل ژیانا وەلاتییان دكەت، نها باژاڕێن كوردستانێ ب گشتی و پارێزگەها دهۆكێ ب تایبەتی، روو ب رووی دیاردەیا بەلاڤبوونا سەیێن بەرەڵا و بێ خۆدان ل ناڤ جادە و كۆلانان بووینە، چ ب شێوەیێ تاك یانژی ب كۆم، كو ئەڤ چەندە بوویە ئەگەرێ دلگرانیا رێبار و جهنشینیان.
ئەگەر:
نەبوونا ناڤەندێن دالدەدان و خۆدانكرنا كاڕا.
لاوازییا بجهئینانا قانوونێن پەیوەندیدار ب پاراستنا ئاژەلان و رێكخستنا ئاژەڵێن بەرەڵا و بێ خۆدان.
هاڤێتنا گلێش و پاشماوەیان ب شێوەیەكێ هەڕەمەكی كو ئاژەلان رادەكێشیت.
زێدەبوونا بێ سەروبەر و نەبوونا پرۆگرامێن تەعقیمكرنێ.
نیشان و مەترسی:
ـ هێرشكرنا سەیان بۆ سەر زارۆك و ئافرەتان ل هندەك جهان كو ئەڤان رۆژان زارۆیەك كوشتیە و هندەك بریندار كرینە خۆدێ سەبر و هەدارێ بدەت مال بات و كەسوكاران.
ـ دروستكرنا ترس و دلراوكێیێ بۆ رێبواران ب شەڤ و ب رۆژ.
ـ ئەگەرێ ڤەگوهاستنا نەخۆشییان، ب تایبەت نەخۆشییا (داء الكلب). تێكدانا ژینگەهێ و سیمایێ جوان و شارستانی یێ شار و باژێڕان.
چارەسەری و پێشنیار:
ـ ئاڤاكرنا شێلتەر و ناڤەندێن تایبەت بۆ پاراستن و تەعقیمكرنا سەیان.
ـ دەسپێكرنا پرۆگرامێن كوتانێ (تطعیم) و تۆماركرن و دویڤچوونا تەندروستی.
ـ هەماهەنگی د ناڤبەرا باژێرڤانییان و رێكخراوێن ڤێتێرنەری و ژینگەهپارێزیێ.
بلندكرنا ئاستێ هوشیارییا جڤاكی، ب تایبەت سەبارەت نەدانا خوارنێ ب سەیان ل ناڤ كۆلانان ب شێوەیەكێ نەرێكخستی.
سەپاندنا سزایان ب سەر وان كەسێن سەیان بەردەدەن یان ل شەقامان بێ خۆدان دهێلن.
مفاوەرگرتن ژ ئەزموونێن نێڤدەولەتی یێن سەركەفتی بۆ رێكخستنا ڤی مەلەفی.
بانگەواز:
ئەم داخوازێ ژ حوكمەتا خۆجهێ، باژێرڤانی و رێكخراوێن پەیوەندیدار یێن ناڤخۆیی و نێڤدەولەتی دكەین، كو پلانەكا خێرا و كاڕا دابنێن بۆ پاراستنا وەلاتییان و دابینكرنا سەلامەتییا جادە و ژینگەهێ، ب رێكا چارەسەریێن مرۆڤایەتی و پراكتیكی.
