جـادەیێن دهـۆكـێ
دلـۆڤـان ئـاكـرەیـی
باژێرێ دهۆكێ، كو ب ئارامی و جوانییا خۆ یا سروشتی دهێتە نیاسین، ئەڤرۆ روو ب روو ب ئالنگاریەكا مەترسیدار بوویە و دیاردەیا هەڤركی و زێدە هاژوتنا ترۆمبێلان ژلایێ گەنجان ڤە ل ناڤ جادەیێن سەرەكی دا، ئەڤ دیاردەیە تنێ سەرپێچیەكا یاسایی نینە، بەلكو كێشەیەكا پێكڤەگرێدایی یە كو زیانێن وێ دگەهنە ناڤ دلێ هەر مالەكا ڤی باژێری، دەسپێك ژ خێزانێ دەستپێدەكەت؛ دەمێ ئامرازەكێ مرنێ (ترۆمبێلەكا بێهێز و بلەز) ددەنە دەستێ گەنجەكێ نەگەهشتی، بێی چاڤدێریەكا هویر ل گەل بكەن و پاشان ژی رۆلێ سۆشیال میدیایێ دهێت، كو بوویە گۆڕەپانەك بۆ نمایشكرنا قەهرەمانیێن خەیالی و كۆمكرنا لایكان ل سەر حسابا ژیانا خەلكی، ئەڤە دبیتە ئەگەر گەنج جادەیێ وەك ستەیجەكێ نیشاندانا هێزێ ببینیت، نەك وەك رێیەكێ بۆ گەهشتنێ،
كارتێكرنا ڤێ هاژوتنا بێسەروبەر تنێ د رویدانێن دلتەزین دا كورت نابیت ئەڤ رەفتارە ئارامیا دەروونی یا باژێری تێكددەت، شەڤێن دهۆكێ، كو دڤیا دەمێ بێهنڤەدانێ بن، بووینە گۆڕەپانا دەنگێ بلند یێ گزۆز و نالینا تایرێن ترۆمبێلان و ئەڤە دبیته ئەگەرێ پەیدابوونا جۆرەكێ دژایەتیێ د ناڤبەرا تەخێن جڤاكی دا؛ وەلاتی ب چاڤەكێ تووڕە بەرێ خودەنە گەنجی، و گەنج ژی خۆ وەك یاخیبوویەك دبینیت، ب ڤێ ئەگەرێ زیانێن ماددی بارەكێ گران دئێخنە سەر ملێن حكومەتێ و وەلاتیان و تێكچوونا جادەیان، شكاندنا ستوینێن كارەبێ و جوانكاریا ناڤ باژێری، خەرجیێن مەزنن و ژ دەستدانا گەنجان یان كێمئەندامبوونا وان، ژ دەستدانا هێزا كار و پاشەڕۆژا ئابووریا باژێری یە، لەوما بۆ بنبڕكرنا ڤێ دیاردەیێ، پێدڤی ب كارەكێ پێكڤەگرێدایی هەیە و یاسا و دانانا كامیرەیان یان پەروەردە ب تنێ نە بەسن بەلكو پێتڤی یە سزایێن دارایی دژوارتر هەبن و دەست ب سەر وان ترۆمبێلان دا بگرن ومامۆستایێن ئایینی و پەروەردەكار ژی ل سەر سەكۆ و د پۆلان دا، هاژۆتنا بلەز وەك تاوانەكا ئەخلاقی بەرانبەر جڤاكێ بدەنە ناسین.
د دوماهیێ دا دبێژم، جادەیێن دهۆكێ پشكنینا هۆشیاریا مە یا جڤاكی نە و پاراستنا ژیانا گەنجان و ئارامیا باژێری بەرپرسیاریەكا هەڤپشكە و نابیته قوربانیا چەند خۆلەكەكێن كەیفەكا دەمكی.