بەرپرسەكا وەزارەتا پلاندانانێ: هێلا گشتی یا ڤەگوهاستنێ دێ كاریگەری ل سەر كەرتێ هاتنوچوونێ هەبیت
هەولێر، قائید میرۆ:
بەرپرسەكا وەزارەتا پلاندانانێ دیاركر، چەندین سالە پلان بۆ ڤەكرنا هێلا گشتی وەكی ترام و شەمەندەفرێ هەیە، بەلێ هێشتا نەچوویە د بیاڤێ بجهئینانێ دا و دبێژیت: ئەز پێشبینی دكەم ل كابینەیا داهاتی بكەڤیتە كاری و كاریگەریێن زۆر ژی دێ هەبن.
دكتۆر كەنار فازل، رێڤەبەرا گشتی ل وەزارەتا پلاندانانێ بۆ رۆژناما ئەڤرۆ دیاركر، سالێن بۆری زۆر بەحسێ هێلا گشتی یا ڤەگوهاستنێ هاتیە كرن، وەكی: شەمەندەفر و ترام و گۆت: «هێلا گشتی یا ڤەگوهاستنێ ژ گەلەك لایان ڤە كاریگەریێن خوە هەنە، بۆ نموونە: لسەر ژینگەهێ و لسەر كەرتێ رێك و پران و هەتا كاریگەری لسەر ساخلەمیا مرۆڤی ژی هەیە، پلانا هێلا گشتی بەری نوكە ژی هەبوویە، بەلێ هەتا نوكە نەچوویە د بیاڤێ بجهئینانێ دا».
دكتۆر كەنار فازل گۆت ژی: «باشترین رێك بۆ پڕۆژەیێ هێلا گشتی ئەڤەیە، ب هەماهەنگی ل گەل كەرتێ تایبەت بهێتە ئەنجامدان، یان ژی ب رێیا قەرێ نێڤدەولەتی، ئەگەر كابینەیا نوو یا حوكمەتا هەرێما كوردستانێ بهێتە پێكئینان دێ پلانا ڤەكرنا هێلا گشتی كەڤیتە د بیاڤێ بجهئینانێ دا».
