قووناغا ئاشتیێ نەبوویە جهێ دلخوەشیا کوردان
چەندین کۆمپانیێن راپرسیان ل تورکیا دیار دکەن د ئەنجاما راپرسیێن وان دا دیار بوویە کو وەلاتیێن کورد ژ قووناغا ئاشتیێ دلخوەش نینن و وەکو تەکتیکەکا حوکمەتێ دبینن و باوەر ناکەن کو دەستهەلاتا نها دێ پرسا کوردی چارەسەر کەت.
چەندین کۆمپانیێن راپرسیان و هەروەسا ناڤەندێن ڤەکۆلینان د چەند رۆژێن بۆری دا ئەنجامێ راپرسی و ڤەکۆلینێن خوە ل دۆر قووناغا ئاشتیێ و دیتنا وەلاتیێن کورد ل دۆر قووناغا ئاشتیێ دیار کرن و راگەهاندن، باوەریا کوردان ب قووناغا ئاشتیێ نینە، چونکی هەکە دەولەتا تورکیا بڤێت پرسا کوردی چارەسەر بکەت دڤێت بەری هەر تشتەکێ هەموو گرتیێن سیاسی ب تایبەتی ژی سەلاحەدین دەمیرتاشی ئازاد بکەت، لێ هەتا نها تشتەک وەسا نەهاتیە کرن و هەتا نها ژی بەرپرسێن دەولەتێ دبێژن تورکیا بێ تیرۆر و بەحسێ چارەسەرکرنا پرسا کوردی ناکەن.
کۆمپانیێن راپرسیان دیار دکەن، وان راپرسی ل گەلەک باژێرێن مەزن یێن کوردان ل تورکیا کرینە و باوەریا وەلاتیێن کورد ب قووناغا ئاشتیێ نینە و ئەو دبێژن، هەتا نها ژی ب کریاری چو نەهاتیە کرن و هێشتا ژی سیاسەتا قەیوومان یا بەردەوامە و هەتا نها دەولەتا تورکیا ب فەرمی هەبوونا گەلێ کورد ل تورکیا قەبوول نەکریە و ئاستەنگی ل هەمبەر پەروەردەیا ب زمانێ کوردی هەیە و بەرپرسێن تورکیا هەتا نها ژی بەحسێ مافێن کوردان ناکەن و هەردەم دبێژن تورکیا بێ تیرۆر، ئانکۆ سوباهی قووناغا ئاشتیێ ب دووماهی بهێت چو ناگەهیتە کوردان و ژ بەر ڤێ یەکێ ژی کورد وەسا دبینن دڤێت بلەز هندەک تشت بهێنە کرن.
ل گۆر ناڤەندێن ڤەکۆلین و راپرسیان وەلاتیێن کورد داخواز دکەن د زووترین دەم دا یاسایێن پێدڤی ل پەرلەمانێ تورکیا دەرکەڤن و ب جهێ تورکیا بێ تیرۆر بەحسێ قووناغا ئاشتیێ و چارەسەرکرنا پرسا کوردی بهێتە کرن، هەروەسا هەموو ئاستەنگێن ل هەمبەر زمانێ کوردی بهێنە راکرن و زمانێ کوردی ببیتە زمانێ فەرمی یێ پەروەردێ و بۆدجە بۆ پێشڤەبرنا زمانێ کوردی بهێتە تەرخان کرن.
ل ئالیێ دی چاڤدێرێن سیاسی ل تورکیا و باکورێ کوردستانێ ژی وەسا دبینن، هەتا نها ژی بەحسێ مافێن گەلێ کورد ل تورکیا ناهێتە کرن و سەبارەت ب چارەسەرکرنا پرسا کوردی چو پرۆژەیەک نینە، ئەو یەک ژی بوویە ئەگەرێ دلگرانیا کوردان، چونکی وەلاتیێن کورد ل تورکیا وەسا دبینن پشتی ب هزاران قوربانی دڤێت دەولەتا تورکیا ب کریاری هندەک تشتان بکەت، هەکە ئەو یەک نەهێتە کرن قووناغا نها چو ئەنجامێن خوە بۆ کوردان نابیت، چونکی بابەتێ مافێن نەتەوەیی یێن گەلێ کورد و تورکیا بێ تیرۆر دو تشێن گەلەک ژێک دوورن و دڤێت دەستهەلاتا تورکیا رێزێ ل مافێن رەوا یێن گەلێ کورد بگریت.
