لڤینێن بازرگانی بەر ب ئاسایی بوونـێ دچـن
هەولێر، قائید میرۆ:
بەرپرسەكێ وەزارەتا بازرگانی و پیشەسازی خویاكر، پشتی سەرەدانا سەرۆكێ هەرێمێ و سەرۆكێ حوكمەتێ بۆ بەغدا نوكە رەوشا بازرگانی بەر ب ئاسایی بوونێ دچیت و دبێژیت: ئاریشەیێن د ناڤبەرا هەولێر و بەغدایێ دا دێ هێنە چارەسەركرن.
سەروەر هاواری، بریكارێ وەزارەتا بازرگانی و پیشەسازی یا حوكمەتا هەرێما كوردستانێ بۆ رۆژناما ئەڤرۆ دیاركر، پشتی سەرەدانا سەرۆكێ هەرێما كوردستانێ و سەرۆكێ حوكمەتێ بۆ بەغدایێ كاریگەریێن ئەرێنی لسەر كەرتێ بازرگانی هەبووینە، ژ بەركو ئەڤان سەرەدانان سەقامگیری ل بازاڕی پەیداكریە و باوەری بۆ خەلكی ڤەگەڕیایە و گۆت: «یا خۆیایە پشتی دەستپێكرنا شەڕی و تێكچوونا پەیوەندیێن د ناڤبەرا هەولێر و بەغدایێ دا سستیەك ب بازاڕی ڤە دیاربوو، كاریگەری لسەر كێمبوونا لڤینێن بازرگانی هەبوو، ب تایبەتی ژی بەغدا هندەك بڕیارێن نوو دەركربوون، مینا: بجهئینانا سیستەمێ ئەسیكۆدا و زێدەكرنا باجا گومركی».
سەروەر هاواری گۆت ژی: «نوكە پشتی سەرەدانا نێچیرڤان بارزانی و مەسرور بارزانی بۆ بەغدا گوهۆڕین پەیدابووینە و هیڤیەك هەیە ئاریشەیێن هەلاویستی د ناڤبەرا هەرێم و بەغدایێ دا بهێنە چارەسەركرن و ئەو ئاستەنگێن هەمبەر كەرتێ بازرگانی ژی نەمینن، لەوڕا ئەم باوەرین رەوش بەر ب ئاسایی بوونێ دچیت و پێشبینی دكەین لڤینێن بازرگانی هێشتا باشتر بن، چونكی ئەو ترس و دودلیا بەرێ نەمایە».
