ب پشکداریا کوردان کار بۆ ئاڤاکرنا تورکیایەک نوو دکەین
سەرۆکێ پەرلەمانێ تورکیا دیار دکەت قووناغا ئاشتیێ ژ بۆ تورکیا گەلەک گرنگە، چونکی نها سیستەمەک نوو ل جیهانێ دهێتە دروست کرن و تورکیا دێ بیتە وەلاتەک گەلەک بهێز و ب پشکداریا کوردان ئەو کار بۆ تورکیایەک نوو دکەن.
نومان کورتولمیش سەرۆکێ پەرلەمانێ تورکیا دیار کر، نها ل سەر ئاستێ جیهانێ کار بۆ ئاڤاکرنا سیستەمەک نوو دهێتە کرن، تورکیا دێ بیتە ئێک ژ وەلاتێن هەری بهێز ل دەڤەرێ و ل جیهانێ ژی و ژ بەر ڤێ یەکێ ژی هێزێن سیاسی ل تورکیا کار بۆ چارەسەرکرنا پرسێن هەی دکەن، وەکو تورکیا مە دڤێت ئێدی چو شەڕ ل تورکیا روو نەدەن و هەموو وەلاتیێن تورکیا د ناڤ ئاشتیێ دا بژین و گۆت: (ل گەل کوردان و هەموو پێکهاتەیێن دی ئەم کار دکەین کو تورکیایەک نوو ئاڤا بکەین کو تێدا کەس هەست نەکەت وەلاتیێ پلە دویە، مە دڤێت پێکڤە تورکیا بکەینە وەلاتەک گەلەک خوەش و پێشکەفتی و نها کارێن باش ژی دهێنە کرن).
سەرۆکێ پەرلەمانێ تورکیا ئەو یەک ژی دیار کر، راستە هندەک هێز دخوازن ئاستەنگان ل هەمبەر بهێزبوونا تورکیا دروست بکەن، لێ هەموو وەلاتیێن تورکیا پشتەڤانیێ ل قووناغا ئاشتیێ دکەن، هەکە تورکیا پرسێن خوە چارەسەر بکەت دێ بهێز بیت و تورکیایەک نوو و بهێز دێ شێت بیتە هێزەکا گەلەک مەزن و کاریگەر ل دەڤەرێ و هەتا جیهانێ ژی.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، د چەندین سالێن بۆری دا ژ بەر شەڕی زیانێن گەلەک مەزن گەهشتینە تورکیا، پشکەکا مەزن ژ بۆدجێ تورکیا ژ بۆ شەڕی دهاتە تەرخان کرن، لێ نها مە دڤێت ئێدی پڕانیا داهاتێ تورکیا ژ بۆ پێشکەفتنێ و خوەشکرنا ژیانا وەلاتیان بیت و ژ بەر ڤێ یەکێ ژی مە دڤێت ئێدی شەڕ د رۆژەڤا تورکیا دا نەمینیت و گۆت: (هەتا نها کارێن گەلەک باش هاتینە کرن، ئەم هیڤیدارین د دەمەکێ نێزیک دا قووناغا ئاشتیێ بگەهیتە وێ ئارمانجا کو مە دڤێت، هەموو وەلاتیێن تورکیا ژی ئەڤرۆکە چاڤەرێنە کو ئاشتی و ئارامی ل تورکیا هەبیت، دەمێ ئاشتی و ئارامی هەبیت دێ رەوشا ئابووری یا تورکیا ژی گەلەک باشتر لێ هێت و بێگومان نها یا پێدڤی دهێتە کرن).
سەبارەت ب یاسایێن ئاشتیێ ژی سەرۆکێ پەرلەمانێ تورکیا دیار کر، لیژنەیێن پەیوەندیدار کار بۆ دەرخستنا یاسایان دکەن و نها کارەک باش دهێتە کرن و گۆت: (پێشبینی دکەم د دەمەکێ نێزیک دا یاسایا ئاشتیێ بهێتە پەسەند کرن و بێگومان دێ وی دەمی قووناغەک گەلەک گرنگ ل تورکیا دەستپێکەت، دڤێت ئەم هەموو کار بۆ سەرکەفتا قووناغا ئاشتیێ بکەین).
