نەخۆشیا (تەپەكێ) ل دەڤەرا ئاكرێ زیانێن مەزن گەهاندینە ئاژەلداران
رەمەزان زەكەریا
ل گوندێ شەرمن یێ سەر ب دەڤەرا ئاكرێ ڤە، بەلاڤبوونا نەخۆشیەكا گران د ناڤ ئاژەلان دا بوویە ئەگەرێ مرار بوونا چەندین سەرە چێلان و ب ڤێ چەندێ ژی زیانێن ئابووری یێن مەزن ب خودانێن وان كەفتی نە و بارگرانیەكا زێدە بۆ گوندیان دروستكریە.
مستەفا ئاژەلدارەكێ گوندێ شەرمنە بۆ ئەڤرۆ گۆت: ئەڤ نەخۆشیا نوكە د ناڤ گوندی دا بەلاڤبووی ب تەپەكێ دهێتە ناسین نیشانێن سەرەكی یێن ڤێ نەخۆشیێ ئەون كو دەڤ و پێن چێلان كول دبن ئەڤ چەندە دبیتە سەدەم كو ئاژەل نەشێن چ خارنێ بخۆن و ژبەر ئیشانا پێن خۆ ژی نەشێن ب ڕێكێ ڤە بچن هەتا نوكە هژمارەكا زۆر یا چێلان تووشی ڤێ پەتایێ بووینە و بریندارن، كو ئەڤە ژی مەترسیێ ل سەر پاشەڕۆژا كەرتێ ئاژەلداریێ ل دەڤەرێ دا دروست كریە.
ناڤبری گۆت ژی: داخوازیێ ژ لایەنێن پەیوەندیدار و تیمێن ڤێتێرنەری دكەین ب رەنگەكێ بلەز بهێنە سەر خەتێ دەرزی و دەرمانێن پێدڤی بگەهیننە گوندی دا كو ڕێگری د بەلاڤبوونا پتر یا پەتایێ دا بهێتە كرن و ڕێژەیا زیانێن وان پتر لێ نەهێت.
ئازاد عەبدولا، ئاژەلدارەكێ دی یێ دەڤەرا ئاكرێ یە بۆ ئەڤرۆ گۆت: رێژا زۆرا بارانبارینێ و هشك نەبوونا ئەردی بۆ دەمەكێ درێژ بۆ هۆكار كو پێن چێلا كول ببن و بكەڤنە مال ژبەركو پتریا وەرزێ بووری باران بارین و چێل د ناڤ دەشت و چیا دابوون و بەردوام پێن وان تەربوون ئەڤ چەندە بۆ هۆكار كو تووشی نەخۆشیێ و ناسكبوونا پێیا ببن هەتا دەر ئەنجام تووشی نەخۆشیا تەپەكیێ بووی ئەگەر زوو بهێنە چارەسەركرن زیانێن وێ كێمترن بەلێ ئەوێن درەنگ دزانن ب ساناهی ساخ نابنەڤە.
عەلی محەمەد، شارەزایەكێ نەخۆشیێن ئاژەلی بۆ ئەڤرۆ گۆت: كو پشكەكا مەزن یا مراربوونا چێلان بۆ كێمبوونا هشیاری و نەشارەزاییا خودان ئاژەلان دزڤڕیت ژبەركو نەناسینا نیشانێن دەستپێكێ یێن نەخۆشیێ و درەنگ گەهاندنا چارەسەریێن ڤێتێرنەری دبنە سەدەم كو بارودۆخێ چێلان تێكبچیت و د ئەنجام دا مرار ببن.
