من داخواز ژ ئەردۆغانی کر هەموو گرتیێن سیاسی بهێنە ئازاد کرن
ئەندامەکێ کورد یێ پەرلەمانێ تورکیا دیار دکەت د هەڤدیتنا ل گەل ئەردۆغانی دا وی داخواز ژێ کریە کو بریارا دادگەها مافێن مرۆڤی یا ئۆرۆپا بجه بینن و سەلاحەدین دەمیرتاش و هەڤالێن وی ل گەل گرتیێن دی یێن سیاسی بهێنە ئازاد کرن.
سڕی ساکیک ئەندامێ پەرلەمانێ تورکیا ژ فراکسیۆنا دەم پارتی دیار کر، هەڤدیتنا وی ل گەل سەرۆک کۆمارێ تورکیا باش دەرباز بوویە و د هەڤدیتنێ دا وی داخواز ژ سەرۆک کۆمارێ تورکیا رەجەب تەیب ئەردۆغانی کریە کو هەموو گرتیێن سیاسی یێن کورد ل تورکیا بهێنە ئازاد کرن و گۆت: (بەری نها هەمان تشت ل تورکیا روو دایە، دەمێ کو دادگەها مافێن مرۆڤی ل دۆر کەیسا لەیلا زانا و هەڤالێن وێ ژی بریارا ئازادکرنا دا و وی دەمی دادگەها تورکیا ژی هەمان بریار دا و لەیلا زانا و هەڤالێن وێ هاتنە ئازاد کرن و نها دڤێت تورکیا بریارەکا وەسا بدەت و گرنگە د زووترین دەم دا سەلاحەدین دەمیرتاش و هەڤالێن وی بهێنە ئازاد کرن).
ئەندامێ کورد یێ پەرلەمانێ د بەردەوامیا ئاخڤتنا خوە دا ئەو یەک ژی دیار کر، نها ل تورکیا قووناغا ئاشتیێ بەردەوام دکەت و مخابن هەتا نها ژ ئالیێ دەولەتا تورکیا ڤە ب کریاری چو نەهاتیە کرن، د هەڤدیتنا ل گەل ئەردۆغانی دا بەحسێ ڤێ یەکێ ژی هاتە کرن و مە داخواز ژ ئەردۆغانی کر کو دەلیڤەیا گرنگ و دیرۆکی ژ دەست نەچیت و کار بۆ ئاشتیێ و چارەسەرکرنا پرسا کوردی بهێتە کرن، دڤێت چاڤەرێ بین دا بزانین کا دێ چ روو دەت، لێ گرنگە دەولەتا تورکیا ب کریاری ئێدی هندەک تشتان بکەت، ب تایبەتی ژی نها بابەتێ ئازادکرنا دەمیرتاشی و گرتیێن دی یێن سیاسی د رۆژەڤێ دایە و کورد داخواز دکەن د زووترین دەم دا دەمیرتاش و هەڤالێن وی بهێنە ئازاد کرن، چونکی ئەو یەک دێ نیەتا پاک یا دەولەتێ ژی بۆ ئاشتیێ نیشا دەت.
سڕی ساکیک ئەو یەک ژی دیار کر، کورد دلگرانن کو هەتا نها سەبارەت ب قووناغا ئاشتیێ ژ ئالیێ دەولەتا تورکیا ڤە چو نەهاتیە کرن، چونکی ئۆجەلانی هەتا نها گەلەک تشت کرینە و سەلماندیە کو ئەو بەرهەڤن دەست ب قووناغەکا نوو بکەن، لێ مخابن ژ ئالیێ دەولەتا تورکیا ڤە هەمان تشت نەهاتیە کرن و گۆت: (د هەڤدیتنا ل گەل بەرێز ئەردۆغانی دا من بەحسێ ڤان بابەتان هەموویێ کر و من بۆ وی دیار کو کورد دلخوەش نینن و دڤێت دەولەتا تورکیا هندەک تشتان بکەت، هەڤدیتنا مە گەلەک باش دەرباز بوو و ئەز هیڤیدارم سەلاحەدین دەمیرتاش و هەڤالێن وی د زووترین دەم دا بهێنە ئازاد کرن).
