جوانیا سەردەم د ناڤبەرا فلتەرێن سناپی و چانتەکێ میکیاجی دا
ب، هەرهین محەمەد:
د جیهانا ئەڤرۆدا، تێگەهێ جوانکاریێ گۆڕانکاریێن مەزن ب خۆڤە دیتینە و ئەو گۆتنا دبێژیت: ل پشت هەر ژنەکا جوان، سناپچاتەک و چانتەکێ میکیاجی یێ هەی بتنێ دێرەکا تەنزئامێز یان کەیفخۆشیێ نینە، بەلکۆ دەربرینێ ژ راستیەکا نوو یا جڤاکی و تەکنۆلۆژی دکەت کو پێناسەیا جوانیا دەرڤە دکەت و ئەڤرۆ فلتەرێن سناپچاتی و ئامرازێن میکیاجی بووینە دوو هەڤالێن نێزیک یێن زۆربەیا ژنان بۆ دەرکەفتنێ ب وی دیمەنێ ئەو حەز دکەن نیشا جیهانێ بدەن.
فلتەرێ سناپچاتی: زارڤەکرنا نمونەیی
سناپچات نەک بتنێ ئەپلیکەیشنەکێ پەیوەندیێ یە، بەلکۆ بوویە ستۆدیۆیەکا جوانکاریێ یا بلەز د بەریکا هەر مرۆڤەکێ دا و ئەو ب فلتەرێن خۆ یێن جۆراو جۆر دشێت د چرکەیەکێ دا ڕەنگێ پیستی گەش بکەت و کێماسیان ڤەشێریت و وێنەکێ کامل پێشکێش بکەت. ئەڤ تەکنۆلۆژیا بلەز باوەری ب خۆبوونەکا دەمکی ددەتە بکارهێنەری و رێکێ خۆش دکەت بۆ دروستکرنا ناسنامەیەکا دیجیتاڵی یا برەوشت و ل پشت هەر وێنەکێ جوان یێ ل سەر تۆرێن جڤاکی، داهێنانەکا تەکنۆلۆژی هەیە کو هزر و تاما سەردەم ددەتە دیارکرنا جوانیێ.
چانتا میکیاجی: هونەرێ گۆڕانکاریێ
ژ لایەکێ دیڤە، چانتا میکیاجی چەکێ کلاسیکی و بەردەوام یێ ئافرەتێ یە. میکیاژ نە بتنێ بۆ ڤەشارتنا کێماسیانە، بەلکۆ بوویە هونەرەک بۆ دیارکرنا خالێن هێزێ و جوانیێ ددەتە سیمایی و هەر کەرستەیەک دناڤ وێ چانتێ دا، ژ ڕەنگێ لێڤان بگرە هەتا دگەهیتە کلێ چاڤان، چیرۆکەکا جودا یا دەربرینێ ژ خۆ دکەت. ئەڤە هاریکاریا ژنێ دکەت کو د ژیانا راستی دا، ب وی شێوازی دەرکەڤیت کو هەست ب ئارامی و هێزێ بکەت.
هەڤسەنگی دناڤبەرا راستی و جیهانا مجازی دا:
د رۆژنامەڤانیا جڤاکی دا، گرنگە ئەم ل سەر ڤێ دیاردەیێ ب ڕەخنەیی و ئەرێنی ژی ب ئاخڤین. راستی ئەوە کو ئەڤ ئامرازە (سناپچات و مکیاژ) بووینە بەشەک ژ شێوازێ ژیانا نوی. ئەو هێزێ ددەنە مرۆڤی بۆ کۆنترۆلکرنا دیمەنێ خۆ یێ دەرڤە، بەلێ د هەمان دەمدا، نابیت بهێلن جوانیا سروشتی و یا ناڤخۆیی بهێتە ژبیرکرن. چونکە فلتەر چەند یێ جوان لادەت، و مکیاژ چەند یێ پێخۆش بیت، راستی و سادەییا ناڤ دلێ مرۆڤی هەر ئەوا راستیە.
دەرئەنجام: ئەڤ گۆتنە دەربرینێ ژ هێزا سەردەمێ نوو دکەت؛ جیهانەک کو تێدا تەکنۆلۆژیا دیجیتاڵی و هونەرێ کلاسیکی یێ جوانکاریێ دگەل ئێک کۆم دبن دا کو پێناسەیەکا نوو بدەنە “جوانیا دەرڤە و ل پشت هەر ژنەکا جوان، چیرۆکەکا هەولدان و چاڤدێری و بکارئینانا زیرەکانە یا ئامرازێن سەردەم هەیە.
