ل سنۆرێ ئاكرێ ٩ كەس ب تۆمەتا داربڕین و تێكدانا ژینگەهێ هاتینە دەستەسەركرن
رەمەزان زەكەریا:
د دو مەهێن بۆری دا ژینگەها سنۆرێ دەڤەرداریا ئاكرێ ڕووبڕووی زیانێن مەزن بوویە، ل 10 جهێن جودا ب سەدان دارێن بەڕوی و مازی هاتینە بڕین، كو ژیێ هندەك ژ وان داران د ناڤبەرا 70 بۆ 100 سالان دابوویە.
شارەزایێن ژینگەهێ هۆشداریێ ددەن و ڕادگەهینن، ئەگەر تاوانبار نەهێنە سزادان و ئەڤ كارێن تێكدانێ نەهێنە ڕاگرتن، د چەند سالێن داهاتی دا دارستانێن مەزن یێن ئاكرێ دێ بەر ب بیابانبوونێ چن.
ل دۆر ڤی بابەتی و د دەمێ دو مەهان دا 9 كەس ژ لایێ هێزێن پۆلیسان ڤە ب تۆمەتا داربڕینێ هاتینە دەستەسەركرن و گەڕیان ل دووڤ تۆمەتبارێن دی یا بەردەوامە.
ڕێڤەبەریا پۆلیسێن ئاكرێ هۆشداریێ ددەتە وەلاتیان، كو ژ داربڕین و تێكدانا سروشتێ دەڤەرێ دوور بكەڤن، ئەگەر نە دێ ب توندترین شێواز هێنە سزادان، سزایێن یاسایی خۆ د دەستەسەركرن و سزایێ دارایی دا، كو سزایێ زیندانیكرنێ دگەهیتە هەتا ئێك سال و سزایێ دارایی ژی دگەهیتە پێنج ملیۆن دیناران.
پۆلیس هەروەسا داخوازێ ژ هەموو خەلكێ دەڤەرێ دكەن، ل دەمێ دیتنا هەر كەسەكێ داران دبڕیت یان ژینگەهێ تێك ددەت، ئێكسەر لایەنێن پەیوەندیدار ئاگەهدار بكەت و هاریـكار بن د پاراستنا سروشتێ دەڤەرێ دا.
