ئیرانێ ب دەهان گرتیێن کورد سێدارە داینە
رێکخستنا مافێن مرۆڤی یا رۆژهەلاتێ کوردستانێ دیار دکەت، ئیرانێ د دەمێ ١٩ رۆژان دا ٤٩ گرتیێن کورد ل سێدارە داینە و هەروەسا نها مەترسیا سێدارەدانێ ل سەر ب دەهان گرتیێن کورد ژی هەیە و مخابن ژ بەر رەوشا نها یا ئالۆز ل دەڤەرێ کەس بەحسێ ڤان تاوانێن رژێما ئیرانێ ناکەت.
هەمان رێکخستنێ ئەو یەک ژی دیار کریە، رۆژانە رژێما ئیرانێ چالاکڤانێن کورد دەستەسەر دکەت و نها فشارێن گەلەک مەزن ژی ل سەر خێزانێن گرتیان هەنە کو نابیت بەحسێ رەوشا گرتیان بکەن، چونکی نها رەوشا گرتیێن کورد ل زیندانێن ئیرانێ گەلەک خرابە و بەردەوام تووشی ئەشکەنجەدانێ دبن.
رێکخستنا مافێن مرۆڤی یا رۆژهەلاتێ کوردستانێ ئەو یەک ژی دیار کریە کو رژێما ئیرانێ نها سێدارەدانێ وەکو چەکەکێ بۆ ترساندنا خەلکی بکار دئینیت و مخابن رێکخستنێن مافێن مرۆڤی یێن کو رۆژانە بەحسێ مافێن مرۆڤی دکەن ل هەمبەر رێژەیا زێدە یا سێدارەدانا کوردان ل ئیرانێ بێدەنگن.
