ئەردۆغانی دڤێت د دەمەکێ کورت دا یاسایا ئاشتیێ ژ پەرلەمانی دەرکەڤیت
رۆژنامەڤانەکا تورکیا دیار دکەت سەرۆک کۆمارێ تورکیا داخواز ژ سەرۆکێ پەرلەمانی کریە کو بەری بێهنڤەدانا پەرلەمانی دڤێت یاسایا ئاشتیێ دەرکەڤیت و شاندەکێ دەولەتێ ژی د چەند رۆژێن بۆری دا دو جاران سەرەدانا ئۆجەلانی کرینە.
نورای باباجان رۆژنامەڤانا تورکیا دیار دکەت وێ زانیاری ژ کەسێن نێزیکی ئەردۆغانی وەرگرتینە کو سەرۆک کۆمارێ تورکیا بەری چەند رۆژان داخواز ژ سەرۆکێ پەرلەمانێ تورکیا کریە کو بەری بێهنڤەدانا پەرلەمانی دڤێت یاسا ئاشتیێ دەرکەڤیت، فراکسیۆنا ئاکپارتیێ نها دەست ب خەباتەکا مەزن کریە، هەروەسا شاندەکێ دەولەتێ ژی د چەند رۆژێن بۆری دا دو جاران سەرەدانا ئۆجەلانی ل ئیمرالیێ کرینە و سەبارەت ب هندەک خالان رێککەفتن ژی هاتیە کرن.
هەمان رۆژنامەڤانێ ئەو یەک ژی دیار کریە، د هەڤدیتنا شاندێ دەولەتێ و ئۆجەلانی دا ل سەر دو خالان رێککەفتن هاتیە کرن، ئۆجەلانی داخواز کریە هژمارەک زێدە ژ گرتیێن پەکەکێ کو سزایێن وان ل زیندانێ تەمام بووینە د زووترین دەم دا بهێنە ئازاد کرن و هەروەسا یاسایەک تایبەت بۆ ڤەگەرا ئەندامێن پەکەکێ ژی دەرکەڤیت و ئەو ئەندامێن کو پشکداری د چو چالاکیان دا نەکرینە بشێن د دەمەکێ کورت دا ڤەگەرنە ڤە تورکیا و دەست ب ژیانا خوە بکەن.
رۆژنامەڤانا تورکیا ئەو یەک ژی دیار کریە، د قووناغا ئێکێ دا دێ هژمارەک ژ ئەندامێن پەکەکێ ئەوێن کو چەکێن خوە رادەست کرینە دێ ڤەگەرنە ڤە تورکیا و هەروەسا پاشی دێ هژمارەک ژ سەرکردەیێن پەکەکێ ژی کو ناخوازن ڤەگەرنە ڤە تورکیا دێ ئاسانکاری بۆ وان هێتە کرن دا کو بچنە وەلاتەکێ دی و ژ بەر ڤێ یەکێ ژی د چەند رۆژێن بهێت دا دێ هندەک تشتێن نوو روو دەن.
ئەو یەک د دەمەکێ دایە کو بەری چەند رۆژان هەڤسەرۆکێ دەم پارتی دیار کربوو ئالیێ کورد گەلەک تشت ژ بۆ ئاشتیێ ئەنجام داینە، لێ هەتا نها دەولەتا تورکیا ب کریاری چو نەکریە و ئەو یەک ژی بوویە جهێ دلگرانیا کوردان ل تورکیا و پێدڤیە د زووترین دەم دا یاسایا ئاشتیێ ل پەرلەمانێ تورکیا دەرکەڤیت، چونکی قووناغا ئاشتیێ گەلەک سست بەردەوام دکەت و دڤێت دەستهەلاتا نها یا تورکیا نەبیتە ئەگەرێ ژناڤچوونا قووناغا ئاشتیێ.
چاڤدێرێن سیاسی ژی دیار دکەن، هەکە بەری بێهنڤەدانا پەرلەمانی یاسا دەرکەڤیت و هندەک تشت بهێنە کرن دێ قووناغا ئاشتیێ ب رەنگەکێ باش بەردەوام بیت، لێ هەکە ئەو یەک نەهێتە کرن ئێدی باوەریا کوردان ب سۆزێن دەولەتا تورکیا ناهێت و وی دەمی دێ رەوش گەلەک ئالۆزتر لێ هێت و گرنگە دەولەتا تورکیا نیەتا خوە یا پاک ژ بۆ ئاشتیێ نیشا بدەت، چونکی هەتا نها ئەو یەک نەهاتیە کرن.
