جادەیەكا دو سایدی ژ سێجێ بۆ سێمێلێ یا دهێتە چێكرن
سندس سالح سلێڤانەیی:
دەمەكە دەست ب چێكرنا رێكا سێجێ بۆ قەزا سێمێلێ هاتیە كرن و ئەندازیارێ وی پرۆژەی دبێژیت: دو سال بۆ چێكرنا پرۆژەی هاتینە دانان، لێ ئەم دێ بەری ژڤانێ وی ب دووماهی ئینین و شۆفێر و خەلكێ دەڤەرێ ژی ب چێكرنا ڤێ رێكێ د دلخۆشن و دبێژن: دێ بارێ مە سڤك بیت و ئێدی وەكو بەرێ زیان ژی ناگەهیتە ترۆمبێلێن مە.
ئەندازیار(یوسف بەهجەت) سەرپەرشتێ وی پرۆژەی دبێژیت: هەر چەندە ئەڤە دەمەكێ كێمە مە دەست ب ڤی پرۆژەی كری و رێژەیا بجهئینانێ 13% یە، بەلێ پشتی ب دووماهی دهێت دێ گرنگیەكا مەزن هەبیت، چونكو دێ ل هندەك جادەیەكا دو سایدی بیت ژ سێجێ بۆ سێمێلێ، هەروەسا دێ جادەیەكا (خەدەمی) ژی هەبیت، زێدەباری وێ چەندێ دێ (3) پر ژی ل سەر رێكا سەرەكی یا دهۆك بۆ زاخۆ هێنە دانان و ئەڤە هەموو دێ كەڤنە د خزمەتا خەلكێ مە دا، بۆ زانین دەمێ چێكرنا پرۆژەی دو سالن، لێ ئەم دێ بزاڤێ كەین بەری وی دەمی ب دووماهی بینن، كو ئەو ژی ژ سالەكێ نەبۆریت.
هەروەسا گۆت: د پلانێ دا بوو زووتر دەست ب چێكرنا ڤێ رێكێ هاتبا كرن، لێ ژبەر وەرزێ زڤستانێ و هاتنا بارانان ئەم نەشیاین دەستپێبكەین، هەتا لڤێ دووماهیێ ل رێكەفتی 1/5/2026 مە ب شێوەیەكێ فەرمی دەستپێكر و دەمێ بجهئینانێ دوسالن، لێ وەكو مە گۆتی بەری دەمێ خۆ دێ ب دووماهی ئینین.
شوكری موسا، شۆفێرەك بوو ل سەر وێ رێكێ گۆت: بەری نوكە هاتن و چوون لسەر ڤێ رێكێ گەلەكا ب زەحمەت بوو، هەروەسا گەلەك زیان ژی دگەهشتە ترۆمبێلێن مە، لێ ئەم ب باوەرین پشتی ب دووماهی دهێت دێ رێكا مە گەلەك خۆش بیت و ئەم سوپاسیا حكومەتا هەرێمێ دكەین كو ئەڤ پرۆژەیە بۆمە دەڤەرا مە چێكری و هەردەم كارێن باش ژ مرۆڤێن باش دهێنە چاڤەرێكرن.
