مەزنترین كارگەها شوونەواری یا سەردەمێ بەری زایینێ ل ئاكرێ هاتە دیتن
رەمەزان زەكەریا
ل ئاكرێ شوونەوارەكێ دێرین كو ژیێ وی بۆ ٢٣٠٠ سالان ڤەدگەریت، ژ نوو دهێتە دیتن و تۆماركرن، شوونەوارناس ژی دەنە دیاركرن كو ئەڤ شوونەوارە كارگەهەكا مەزنە بۆ دروستكرنا شەرابا تری و زەیتێ زەیتوونان بوویە، د وی دەمی دا ئەڤ دو كەرەستەیێن ب بها یێن بازرگانی پێكرنێ بوونە.
سەركەوت عامر، شوونەوارناس ل رێڤەبەریا شوونەوار و كەلەپۆرێن ئاكرێ بۆ ئەڤرۆ گۆت: ئەڤ جهێ شوونەواری یێ كو نوكە ئەم وەك رێڤەبەریا شوونەوار و كەلەپوورێ ئاكرێ كار تێدا دكەین، مەزنترین كارگەها شوونەواری یا دروستكرنا شەراپ و زەیتا زەیتوونانە ل ئاكرێ، كو دیرۆكا وێ بۆ نێزیكی ٣٠٠ یان ٢٠٠ سالان بەری زایینی ڤەدگەریتەڤە، چونكی د وی سەردەمی دا بازرگانیكردن ب زەیتا زەیتوونان و شەراپا تری ئێك ژ گرنگترین وان ماددان بوو كو خەلكی د وی دەمی دا بازرگانی پێ هاتە كرن.
ل دووڤ ئامارێن رێڤەبەریا شوونەوارێن ئاكرێ: ٧٦٠ جهێن شوونەواری ل دەڤەرێ هەنە، كو بەشەك ژ وان هاتینە نووژەنكرن و لێگەریان و ڤەدیتنێن وان ژی ل سەر د بەردەوامن، داكو تۆمارا خوە یا بەلگەنامەیێن دیرۆكی وەك كەڤناریا ڤی باژێری و دەولەمەندی نیشان بدەن.
