مە چەند پلانەك بۆ وەرگرتنا گەنمی یێن هەین
دووڤچون، قائید میرۆ
بریكارێ وەزارەتا بازرگانی و پیشەسازی ئاماژەكر، پرۆسا وەرگرتنا گەنمی بۆدەمێ ئێك هەیڤ دێ یا بەردەوام بیت و دبێژیت: ل گۆرەی ئەو پشكا بۆ هەرێما كوردستانێ هاتیە دانان تنێ چارسەد هزار تەن ژلایێ بەغداڤە هێنە وەرگرتن، بەلێ حوكمەتا هەرێما كوردستانێ چەند پلانەك هەنە بۆ گەنمێ جۆتیاران و پشتی پرۆسا ب بازاڕكرنێ دێ كار لسەر بهێتەكرن.
سەروەر هاواری، بریكارێ وەزارەتا بازرگانیا هەرێما كوردستانێ بۆ رۆژناما ئەڤرۆ دیاركر» حەفتیا بۆری پرۆسا وەرگرتنا گەنمێ جۆتیاران هاتیە دەستپێكرن و وەزیرێ بازرگانیا ئیراقێ سەرەدانا هەرێما كوردستانێ كر، ئەڤە بۆ جارا ئێكێ یە وەزیرەكێ بازرگانیێ ئیراقێ ددەمێ وەرگرتنا گەنمی سەرەدانا هەرێما كوردستانێ دكەت، ئەڤسالە چوارسەد هزار تەنێن گەنمی دێ هێنە وەرگرتن، ئەڤە ژی رێژەیەكا كێمە بۆ هەرێما كوردستانێ، چونكە ل گۆرەی سەقایێ ئەڤ سالە و هاتنا بارانێن زۆر بەرهەمێ دەنمی زێدەبوویە، لەوڕا پێدڤی بوو رێژا وەرگرتنێ بهێتە زێدەكرن ژلایێ بەغداڤە.
زێدەتر گۆت: ل سالێن بۆری ئیك تەنا گەنمی ب 800 هزار دیناران دهاتە وەرگرتن، ئەڤە ژی بۆ ئەگەر زێدەتر جۆتیار بەرهەمێ گەنمی بچینن، بەلێ نوكە بهایێ وەرگرتنا گەنمی ژی كێم بوویە و هەر تەنەكا گەنمی ب 700 هزار دیناران دهێتە وەرگرتن، ل گۆرەی ئاخفتنا وەزیرێ بازرگانیا ئیراقێ ئەگەرێ كێم كرنا بهایێ كڕینا گەنمی بۆ رەوشا دارایی یا ئیراقێ ڤەدگەڕیت، لسەر ئاستێ وەزارەتا بازرگانی و لسەر ئاستێ حوكمەتا هەرێما كوردستانێ ژی بزاڤێن مە د بەردەوامن بۆ زێدەكرنا پشكا گەنمێ هەرێمێ، ژبەركو خاكا هەرێما كوردستانێ باشترە بۆ بەرهەم ئینانا گەنمی و ئەڤ سالە بەرهەم ژی زێدەبوویە و كوالێتیا گەنمی ژی گەلەك یا باشە، هەرێما كوردستانێ شیانێن وەرگرتنا ئێك ملیۆن تەنێن گەنمی هەنە، بەلێ تنێ دشێین رێژەیا دیاركری بهێتە وەرگرتن.
سەروەر هاواری ئاماژەكر «حوكمەتا هەرێمێ دێ هاریكاریا هەر بازرگانی و كۆمپانیەكێ كەت، ئەگەر بخوازیت گەنمێ جۆتیاران بكڕیت و بۆ بازاڕێن جیهانێ بهنێریت، وەزیرێ بازرگانی ئەم پشتڕاست كرین پشتی ب دووماهی هاتنا پرۆسا وەگرتنا گەنمی جۆتیار دشێت ل سەرانسەری ئیراقێ هەر جهەكێ بڤێت گەنمی ڤەگوهێزیت و بفرۆشیت، ب شێوەیەكێ گشتی پرۆسا وەرگرتنا گەنمی دێ ئێك هەیڤێ ڤەكێشیت ل هەرێما كوردستانێ، وەكی پارە بۆ كڕینا گەنمی ژلایێ حوكمەتێ ڤە بهایەكێ باشە، بەلێ مە گازندە ل كێمیا رێژا وەرگرتنێ هەیە و ئەو رێژا بۆ هەرێما كوردستانێ هاتیە دیاركرن كێمە».
