بێی کـوردان چو رێککـەفتنێن نوو ل دەڤـەرێ سـەر ناگـرن
ب، سهرجان مەحمود:
بسپۆرەکێ پەیوەندیێن نێڤدەولەتی دیار دکەت ئەڤرۆکە هەموو هێزێن جیهانی و رۆژهەلاتا ناڤین هەست ب رۆلێ کوردان کرینە و ئێدی ئەو باش دزانن بێی بەرچاڤ وەرگرتنا رۆلێ کوردان چو بەرنامەیەک ل دەڤەرێ سەر ناگریت.
د. ئیقبال دووڕە بسپۆرێ پەیوەندیێن نێڤدەولەتی دیار کر، ئەڤرۆکە هەم د ئاستێ جیهانی و ئەم ژی د ئاستێ رۆژهەلاتا ناڤین دا هەبوونا گەلێ کورد هاتیە قەبوول کرن، لێ هێزێن دەڤەرێ دخوازن ب دانا کێمترین مافەکێ کوردان رازی بکەن و کورد ژی ڤێ یەکێ ب توندی رەت دکەن و گۆت: (ئەڤرۆکە ل تورکیا قووناغا ئاشتیێ هەیە و ئەو یەک نە تنێ ژ بۆ کوردان بەلکو ژ بۆ تورکیا و هەموو خەلکێن دی یێن کو ل تورکیا دژین دەلیڤەیەکا گرنگە، چونکی گوهۆڕینێن گەلەک مەزن ل دەڤەرێ و جیهانێ روو ددەن و ئێدی کەس نەشێت رۆلێ کوردان پشتگوه بهاڤێژیت و بێی کوردان چو بەرنامەیەک بۆ دەڤەرێ یا سەرکەفتی نابیت).
بسپۆرێ پەیوەندیێن نێڤدەولەتی ئەو یەک ژی دیار کر، دڤێت تورکیا ڤێ دەلیڤەیا دیرۆکی ژ دەست نەدەت، چونکی هەکە نها تورکیا پرسا کوردی چارەسەر نەکەت دێ ئالۆزیێن گەلەک مەزن ل وی وەلاتی روو دەن و ڤێجارێ دێ زیانێن گەلەک مەزن گەهنە تورکیا، گرنگە بەرپرسێن تورکیا ڤێ یەکێ راستیێ قەبوول بکەن کو ئێدی پرسا کوردی بابەتەک جودایە و د ئاستێ جیهانی دا ئێدی پشتەڤانی ل مافێن رەوا یێن گەلێ کورد دهێتە کرن.
د. ئیقال دووڕە ئەو یەک ژی دیار کر، نها بەحسێ رێککەفتنا ئەمریکا و ئیرانێ دهێتە کرن، هەکە تشتەک وەسا روو بدەت دێ ئەو یەک کاریگەریا خوە ل سەر هەموو دەڤەرێ هەبیت و دێ گەلەک گوهۆڕینێن نوو ژی روو دەن، ئانکو دێ د ناڤ ئیرانێ دا ژی گوهۆڕینێن مەزن روو دەن و دهێتە چاڤەرێکرن کو ئیران ژی ئێدی نەچار بیت ژ بۆ چارەسەرکرنا پرسا کوردی ل وەلاتێ خوە دەست ب هندەک گوهۆڕینان بکەت و گۆت: (د رەوشا نها یا ل دەڤەرێ دا ئێدی کەس نەشێت هەبوونا کوردان ئینکار بکەت و بزاڤا ڤێ یەکێ بکەت کو کورد نەگەهنە مافێن خوە، ئەو یەک نەما، نها هەموو وەلاتێن دەڤەرێ دزانن دڤێت ئێدی ل گەل کوردان د ناڤ ئاشتیێ و ئارامیێ دا بژین).
ناڤهاتی د دووماهیا ئاخڤتنا خوە دا بەحسێ ڤێ یەکێ ژی کر، کوردان بۆ هەموو جیهانێ ژی سەلماندینە کو ئەو هەردەم فاکتەرێ ئارامی و ئاشتیێ و پێکڤەژیانێ نە، ژ بەر ڤێ یەکێ ژی هەکە کورد د ناڤا خوە دا ئێکگرتی بن دشێن د گوهۆڕینێن نوو یێن ل دەڤەرێ دا ببنە خوەدان رۆلەک مەزن، گرنگە هێزێن کوردی خواندنەکا راست بۆ رەوشا نها ل دەڤەرێ بکەن.
