جڤاتا باژێڕڤانیا ئاكرێ هەژمارەكا بڕیارێن گرنـگ دان
رەمەزان زەكەریا:
ب ئامادەبوونا دكتۆر دلاوەر بۆزۆ، دەڤەردارێ ئاكرێ جڤاتا باژێرڤانیا ئاكرێ كۆمبوو، تێدا ستراتیژیەت و پلانێن نوو یێن خزمەتگوزاری و رێكخستنا كاروبارێن باژێڕی هاتنە گەنگەشكرن.
د كۆمبوونێ دا بڕیارا هاتەدان ب جوانكاری و كێمكرنا قەرەبالغیا جادەیان و رێكخستنا جادەیا رەزا و سیپە، ئارمانج ژ ڤێ پێنگاڤێ كێمكرنا ئاڕێشەیا قەرەبالغیا هاتنوچوونێ و نیشادانا دیمەنەكێ شارستانی و جوانترە.
د پشكەكا دی یا كۆمبوونێ دا بڕیار هاتەدان بۆ ئاڤاكرنا نهۆما دووێ بۆ وان ئاڤاهیێن گوندان، كو دكەڤنە د ناڤ سنۆرێ باژێڕڤانیا ئاكرێ دا، ئەڤ چەندە دێ هاریكاریا گوندنشینان كەت بۆ بەرفرەهكرنا جهێن خۆ یێن ئاكنجیبوونێ، دیسا بڕیار هاتەدان، پێداچوون د بڕیارا ئاڤاكرنا ئاڤاهیان د ناڤ رەزێن ئاكرێ دا بهێتە كرن.
هەروەسا ب مەرەما پتر خزمەتكرنا پێشمەرگە و فەرمانبەران، بڕیار هاتەدان رێكێن وان پارچەیێن ئەردی بهێنە ڤەكرن و تێكەلەكرن، یێن بەری نوكە ل سەر فەرمانبەر و هێزێن پێشمەرگەی هاتینە بەلاڤكرن، دا كو خودانێن وان بشێن د زووترین دەم دا مفای ژێ وەربگرن.
