سێ پڕۆژەیێن گەشتیاری ل دهۆكێ دێ هێنە بجهئینان
حكومەتا هەرێما كوردستانێ د چارچوڤێ بزاڤێن خۆ دا بۆ هەمەجۆركرنا ژێدەرێن داهاتی و ڤەژاندنا كەرتێ گەشتیاری، نەخشەرێیەكا نوو بۆ وەبەرهێنانێ راگەهاند، كو 24 پڕۆژێن ستراتیژی ل سەرانسەری پارێزگەهـ و ئیدارێن سەربخۆ ب خۆڤە دگریت، ئەڤ پڕۆژە ب پشتەڤانیا دەستەیا وەبەرهێنانێ و دەستەیا گشتی یا گەشتوگوزارێ هاتینە ئامادەكرن و ئەرد و ژێرخانیا پێدڤی بۆ هاتییە دابینكرن.
حكومەتا هەرێمێ دیاركر، بەری نوكە مەسرور بارزانی، سەرۆكێ حكومەتا هەرێما كوردستانێ، د دەمێ پێشانگەها گەشتیاری یا رۆژهەلاتا ناڤین دا راگەهاندبوو، حكومەتا هەرێمێ ب هەموو شیانێن خۆڤە كار دكەت بۆ ب ساناهیكرن و وەبەرهێنان و پێشڤەبرنا ئەڤی كەرتی، داكو ببیتە ژێدەرەكێ داهاتی یێ بەردەوام بۆ هەرێما كوردستانێ.
پارێزگەها دهۆكێ ب سروشتێ خۆ یێ چیایی ناڤودەنگەكێ جیهانی پەیداكریە، نوكە ئامادەكاریێ دكەت بۆ وەرچەرخانەكا مەزن د كەرتێ گەشتیاری دا، حكومەتا هەرێما كوردستانێ د چارچووڤێ ماستەرپلانا خۆ یا نوو دا، سێ دەرفەتێن وەبەرهێنانێ ل جهێن ستراتیژی یێن ئەڤێ پارێزگەهێ راگەهاندینە، ئەو ژی: پڕۆژەیێ گەلیێ زاویتە، پڕۆژەیێ چیایێ زاوا، كو سیمایەكێ دیار یێ دهۆكێ یە و دیمەنەكێ پانۆرامایی ب سەر هەموو باژێری دا هەیە و پڕۆژەیێ بەنداڤا دهۆكێ.
